40:68  contemptu,  sed  ita  desperatam  fuisse  eorum  impietatem,  ut  non  dissimulanter  se  Deo  opponerent,  quemadmodum  si  essent  boves  cornupetae,  vel  tauri  furiosi.  Scimus  hypocrisin  saepe  latere  in  animis,  et  quamvis  homines  turgeant  malitia,  tamen  ipsos  non  prodere  quod  intus  alunt.  Sed  propheta  hic  significat  Israelitas  usque  adeo  proiectos  fuisse  ad  impietatem,  ut  in  ipso  vultu  ostenderent  se  esse  apertos  Dei  hostes.  Summa  est,  prophetam  dum  se  accingit  ad  perferenda  Dei  mandata,  sic  debeie  secum  statuere,  quum  ad  populum  accedet,  suam  doctrinam  non  modo  fore  inutilem  quoad  ipsos,  quia  non  excipietur  qua  meretur  reverentia:  sed  etiam  fore  expositam  multis  contumeliis:  quoniam  Israelitae  non  tantum  occulto  Dei  contemptu  essent  referti:  sed  ostentarent  palam  suam  feritatem,  ut  ita  loquar,  quum  scilicet  essent  frontis  tam  perfrictae,  ut  non  dubitarent  prophetam  quasi  ex  professo  reiicere.  Sunt  ergo  filii  duri,  et  caetera,  ego  tamen  mitto  te  ad  eos.  Hic  rursus  opponit  Deus  suum  mandatum,  ut  propheta  simpliciter  acquiescat  in  hoc  solo  verbo,  quod  scilicet  divinitus  sit  missus.  Quod  si  hominibus  displiceat,  contentus  sit  operam  suam  Deo  probari.  Huc  igitur  pertinet  loquutio,  quae  iam  secundo  repetitur,  mitto  te  ad  eos.  Poterat  enim  excipere  propheta,  Quid  facturus  sum?  Nam  si  sunt  corde  chalybeo  et  fronte  ferrea,  frustra  luctabor.  Deus  autem  ex  opposito  respondet,  prophetam  non  debere  esse  sollicitum,  quia  satis  sit  habere  mandatum:  quemadmodum  si  quis  princeps  non  exponat  totum  suum  consilium  legato,  et  tamen  iubeat  ipsum  legatione  fungi:  ita  Deus  agit  cum  servo  suo.  Videmus  ergo  ut  hic  Deus  suam  autoritatem  magnifaciat.  Et  hoc  diligenter  notandum  est,  ne  semper  velimus  cum  eo  pacisci,  quemadmodum  solemus.  Nisi  enim  Deus  ostendat  praesentem  laboris  nostri  fructum,  languemus:  atque  adeo  conamur,  tergiversando  nos  ab  imperio  eius  eximere.  Deus  autem  hanc  particulam  opponit,  Ecce  ego  mitto  te.  Reliqua  in  diem  crastinum.  Postquam  Deus  servum  suum  admonuit  quam  difficile  munus  susciperet,  iam  ipsum  confirmat,  et  hortatur  ad  invictam  libertatem:  tu,  inquit,  dices:  Sic  loquitur  Deus:  perinde  ac  si  diceret,  hoc  unum  satis  valere  ad  superanda  omnia  obstacula,  quod  Dei  negotium  gerat.  Neque  enim  hic  Deus  certa  dat  mandata:  id  postea  faciet  suo  loco:  sed  generalis  loquutio  est:  sic  dicit  Iehovah,  hoc  est  nihil  profero  ex  me  ipso,  sed  fideliter  recito  quae  Deus  mandavit.  Videmus  ergo  quorsum  tendat  Deus,  nempe  nomen  suum  opponit  contumaciae  populi,  et  iubet  prophetam  ubi  autoritate  hac  instructus  fuerit,  esse  forti  et  intrepido  animo,  quamvis  habeat  graves  et  duros  hostes.  Postea  adiungit,  Sive  audierint,  sive  destiterint,  tamen  cognoscent  quod  fuerit  propheta