35:68  sachans  que  tousiours  il  aura  ceste  autorite,  maugre  tous  contredisans,  de  parler  et  prononcer  ce  qu'il  voudra:  voire,  et  quand  il  parlera  et  une  fois  et  deux,  c'est  a  dire,  qu'il  monstrera  son  plaisir,  sa  volonte,  qu'on  n'y  cognoistra  rien,  que  les  hommes  sont  trop  rudes  pour  entendre  en  un  mot  ce  que  Dieu  a  en  son  conseil:  mais  que  tous  les  iours  ils  verront  une  mesme  chose,  et  toutes  fois  ils  y  seront  tout  nouveaux:  et  au  bout  d'un  an,  au  bout  de  dix,  qu'encores  seront-ils  la  esblouis:  que  combien  que  souvent  ils  ayent  veu  une  chose,  si  est-ce  que  la  raison  leur  en  sera  cachee.  Ceci  nous  est  assez  conferme  par  experience,  n'estoit  la  fierte  qui  est  en  nous,  que  iamais  nous  ne  venons  a  raison  que  par  force,  que  tousiours  nous  voulons  estre  sages:  voire  combien  que  nostre  ignorance  se  monstre  tant  et  plus.  Or  si  est-ce  que  nous  ne  sommes  point  advertis  sans  cause  en  ce  passage,  que  Dieu  aura  ses  iugemens  comme  ensevelis  et  cachez.  Nous  voyons  l'effect  tous  les  iours,  et  cependant  nous  ne  savons  que  dire,  sinon  que  c'est  une  chose  admirable,  et  qu'il  nous  faut  la  tenir  court,  en  attendant  que  nostre  Seigneur  nous  le  revele  en  plus  grande  perfection:  ce  qui  ne  sera  pas,  iusques  a  ce  que  nous  soyons  despouillez  de  ceste  chair  mortelle.  Voila  donc  ce  que  nous  avons  ici  a  retenir.  Or  suivant  l'article  que  i'ai  desia  touche,  notons  aussi  qu'il  n'est  parle  que  des  iugemens  que  Dieu  nous  veut  cacher,  d'autant  qu'il  n'est  point  utile  que  nous  en  ayons  auiourd'huy  pleine  cognoissance.  Il  est  dit  au  Pseaume  soixantedeuxieme  (12),  que  Dieu  parle  une  fois,  et  que  David  proteste  qu'il  l'escoutera  deux  fois,  c'est  qu'il  y  a  puissance  en  Dieu  et  misericorde.  La  il  n'est  point  traitte  comme  ici,  des  iugemens  admirables  de  Dieu.  Quoy  donc?  Plustost  de  ce  que  nous  apprenons  par  sa  parole,  de  ce  qui  nous  est  reduit  en  memoire  et  propose  continuellement:  car  Dieu  nous  veut  faire  sentir  sa  puissance,  afin  que  nous  le  craignions,  et  cheminions  selon  sa  volonte:  d'autre  part,  il  nous  donne  sa  misericorde,  afin  que  nous  soyons  consolez  et  resiouis  en  icelle.  Qu'apprenons  -  nous  iournellement  en  la  parole  de  Dieu?  sinon  qu'il  est  le  maistre  auquel  il  nous  faut  estre  suiets,  et  qu'il  ne  faut  point  que  nous  vivions  a  nostre  appetit,  mais  que  Dieu  domine  par  dessus  nous,  et  que  sa  Loy  soit  une  bride,  que  nous  soyons  instruits  sous  icelle.  Voila  le  premier,  c'est  de  servir  a  Dieu,  et  de  savoir  ce  qu'il  demande  et  approuve.  Le  second  est,  que  nous  le  cognoissions  estre  nostre  pere  et  nostre  Sauveur,  afin  de  mettre  nostre  confiance  pleinement  en  luy.  Et  comment  le  cognoissonsnous?  Nous  fondans  sur  sa  pure  misericorde,  cognoissans  qu'il  n'y  a  que  peche  en  nous  et  perdition,  cognoissans  qu'il  nous  a  retirez  de  la  mort