31:68  niti,  vel  desperatione  concidimus.  Atqui  David  hinc  potius  fiduciae  materiam  petit.  Nam  quo  maiore  licentia  gassantur  hostes,  eo  alacrius  Deum  vindicem  implorat,  cuius  officium  est  improbos  omnes  perdere,  quia  odio  habet  omne  scelus.  Discant  ergo  pii  omnes,  quoties  illis  certamen  est  cum  vi,  fraudibus,  et  iniustitia,  ad  Deum  assurgere,  ut  se  ad  certam  spem  liberationis  animent  :  sicuti  etiam  eos  hortatur  Paulus  2.  ad  Thess.  1.  5.  Documentum,  inquit,  est  iudicii  eius,  quod  nunc  crucem  suffertis:  quia  iustum  est  apud  Deum  rependere  iis  qui  vos  affligunt,  afflictionem:  vobis  autem  qui  affligimini,  relaxationem  nobiscum.  Et  certe  alioqui  non  esset  mundi  iudex,  nisi  impiis  omnibus  apud  eum  merces  sua  esset  reposita.  Nunc  tenemus  huius  doctrinae  usum:  nempe  dum  improbis  lascivientibus,  nobis  obrepit  dubitatio  an  Deus  curam  nostri  gerat:  ut  hunc  clypeum  opponere  discamus,  Deus,  cui  odio  ac  detestationi  est  omnis  iniquitas,  istos  elabi  inultos  non  sinet:  licet  vero  ad  tempus  eos  ferat,  tandem  conscendet  tribunal,  seque  vindicem  ostendet.  Caeterum  hinc  colligitur  etiam  universalis  doctrina,  Deum,  quamvis  per  Satanam  et  impios  operetur,  eorumque  malitia  utatur  ad  exsequenda  sua  iudicia,  non  tamen  esse  peccati  autorem,  nec  peccatum  ei  placere:  quia  semper  iustus  ei  finis  propositus  est:  ut  merito  eos  damnet  ac  puniat  quos  arcana  sua  providentia  impellit  quo  visum  est.  Versu  quinto  ^  quidam  in  masculino  genere  accipiunt  pro  scelesto  homine:  sed  ego  malitiam  potius  intelligo.  Simpliciter  enim  pronuntiat  David,  nullum  Deo  consensum  esse  cum  iniustitia,  postea  ad  homines  ipsos  descendit,  negans  insanos  coram  eius  oculis  staturos.  Est  autem  optima  consequentia,  Deo  exosa  est  iniquitas:  ergo  de  omnibus  iniquis  iustam  ultionem  sumet.  Insanos  vocat,  more  scripturae,  qui  caeca  cupiditate  ad  peccandum  ruunt.  Nihil  enim  magis  furiosum  impiis  qui  abiecto  Dei  timore,  nocendi  libidine  feruntur:  imo  nulla  est  amentia  deterior,  quam  Dei  contemptus,  quo  fit  ut  fas  omne  pervertant  homines.  Quamvis  autem  hoc  sibi  ad  consolationem  proponat  David,  simul  tamen  inde  elicitur  utilis  eruditio  ad  timorem  Dei:  nam  spiritus  Deum  scelerum  ultorem  fore  pronuntians,  fraenum  nobis  iniicit,  ne  spe  impunitatis  peccemus.  8.  Et  ego  in  multitudine  misericordiae  tuae  ingrediar  domum  tuam,  adorabo  in  templo  sancto  tuo  in  timore  tui.  Copulam  adversative  positam  esse  quidam  putant,  quasi  David  se  impiis  comparans  Deum  sibi  propitium  fore  praedicet:  sed  expendant  lectores  annon  magis  conveniat  illative  accipere,  hoc  modo,  Quum  impios  ferre  nequeas  Domine,  ego  igitur  manu  tua  servatus,  solennes  tibi  pro  liberatione