22:68  Des  sacremens.  Les  sacremens  sont  instituez  a  ceste  fin  quilz  feussent  exercices  de  nostre  foy  tant  devant  Dieu  que  devant  les  hommes.  Et  certes  devant  Dieu  ilz  exercent  nostre  foy  quand  ilz  la  confirment  en  la  verite  de  Dieu.  Car  le  Seigneur  nous  a  propose  avoir  les  haulx  et  celestes  secretz  soubz  choses  charnelles,  ainsi  quil  cognoissoit  estre  expediant  a  lignorance  de  nostre  chair.  Non  pas  que  telles  qualitez  soient  en  la  nature  des  choses  lesquelles  nous  sont  proposees  au  sacrement,  mais  parce  que  par  la  parolle  du  Seigneur  elles  sont  marquees  en  ceste  signification.  Car  tousiours  la  promesse  precede  laquelle  est  comprinse  en  la  parolle:  le  signe  est  adiouste,  lequel  confirme  et  seelle  icelle  promesse  et  la  nous  rend  comme  plus  testifiee,  ainsi  que  le  Seigneur  voit  quil  convient  a  la  capacite  de  nostre  rudesse.  Car  nostre  foy  est  tant  petite  et  debile  que  si  elle  nest  appuyee  de  tous  costez  et  soustenue  par  tous  moiens  soubdain  elle  est  esbranlee  en  toutes  pars,  agitee  et  vacilante.  Or  elle  est  aussi  par  les  sacremens  exercee  envers  les  hommes,  quand  elle  sort  en  confession  publique  et  est  incitee  a  rendre  louanges  au  Seigneur.  Que  cest  que  sacrement.  Sacrement  doncques  est  un  signe  exterieur  par  lequel  le  Seigneur  nous  represente  et  testifie  sa  bonne  volunte  envers  nous,  pour  soustenir  limbecillite  de  nostre  foy,  ou  (pour  dire  plus  briefvement  et  plus  clairement)  cest  un  tesmoignage  de  la  grace  de  Dieu  declare  par  signe  exterieur.  LEglise  chrestienne  use  tant  seulement  de  deux  sacremens,  cest108)  a  scavoir  du  baptesme  et  de  la  cene.  Du  baptesme.  Le  baptesme  nous  a  este  donne  de  Dieu  premierement  a  ce  quil  servist  a  nostre  foy  envers  luy,  secondement  a  nostre  confession  envers  les  hommes.  La  foy  regarde  la  promesse  par  laquelle  le  Pere  misericordieux  nous  offre  la  communication  de  son  Christ,  affin  que  estans  vestuz  de  luy  nous  soions  participans  de  tous  ses  biens.  Toutesfois  le  baptesme  peculierement  represente  deux  choses:  la  premiere  est109)  la  purgation,  laquelle  nous  obtenons  au  sang  de  Christ:  lautre  est110)  la  mortification  de  nostre  chair,  laquelle  nous  avons  eu  par  108)  Cette  derniere  ligne  manque  dans  le  latin.  109)  la  premiere  est  om,  110)  l'autre  est  om.