9:672  XX.  IUDAEUS.  Quaere,  quare  dixerit,  datum  est  mihi  omne  dominium  coeli  et  terrae?  Quis  enim  dedit  ei?  si  est  filius  Dei  et  Deus,  ut  vos  dicitis,  non  erat  opus  dono.  Nonne  enim  totus  mundus  illius  est?  CALVINUS.  Quaere,  quomodo  dicatur  populus  Israel  fuisse  Dei  sanctificatio,  dum  ex  Aegypto  redemptus  est,  si  Dei  sanctitas  neque  mutuatur  quidquam  ab  hominibus,  neque  vel  principium  vel  finem  habet?  Quaere  etiam,  cur  Deus,  in  cuius  manu  est  rerum  omnium  copia,  dicitur  accepisse  dona  ab  hominibus  devictis  ac  si  se  hostium  spoliis  ditasset  (Psal.  68,  19)?  Quaere  item,  quomodo  in  Psalmo  (45,  8)  rex  dicatur  unctus  fuisse  oleo  laetitiae  prae  consortibus  suis,  qui  tamen  ibidem  vocatur  Elohim,  qui  in  solio  aeterno  sedet?  Certe  nisi  Christus  cum  hominis  persona  inopiam  nostram  vel  nuditatem  in  se  sumpsisset,  supervacua  esset  ista  donatio,  de  qua  loquitur.  Nec  vero  deitatis  suae  intuitu  precarium  se  imperium  habere  dicit  Christus:  sed  praedicat  qua  imperii  gloria  ornatus  fuerit  secundum  hominem,  sicut  alibi:  pater  glorifica  filium  gloria  quam  apud  te  obtinuit  antequam  creatus  esset  mundus  (Ioann.  17,  5):  quibus  verbis  satis  superque  diluitur  putidum  hoc  cavillum  :  quia  gloriam,  quae  prius  abscondita  fuit  ab  oculis  hominum,  distincte  petit  in  carne  patefieri.  Eodem  quoque  modo  Paulus  optime  distinguit,  quia  se  ipsum  exinanivit,  datum  ei  fuisse  nomen  quod  est  super  omne  nomen,  ut  coram  eo  flectatur  omne  genu  (Phil.  2,  7  sqq.).  XXI  IUDAEUS.  Quaere:  Quemadmodum  caro  et  spiritus  simul  sunt  homo,  sic  secundum  verba  vestra  divinitas  et  humanitas  simul  sunt  Messias.  Quod  si  verum  est,  quum  est  occisa  humanitas,  occisa  est  deitas.  Fuit  enim  Iesu,  secundum  verba  vestra,  Deus  et  homo,  et  occisus  est.  Ergo  occisa  est  eius  deitas.  Si  autem  occisa  est  eius  deitas,  is  non  fuit  Deus.  Nam  Deus  non  occiditur.  CALVINUS.  Quaere,  quum  mortui  sint  omnes  sancti  patres,  an  credant  eorum  animas  una  cum  corporibus  ex-