35:670  sommes  povres  pecheurs,  que  nous  sommes  obligez  a  ton  iugement,  qu'il  est  impossible  d'y  satisfaire  de  nostre  coste,  et  qu'il  n'y  a  que  Iesus  Christ  qui  doyve  este  recognu  suffisant  pour  y  satisfaire.  Nous  confesserons  donc  cela  avec  toute  humilite:  nous  protesterons  que  nous  sommes  creatures  perdues  et  damnees  iusques  a  ce  que  nostre  Seigneur  Iesus  nous  tende  la  main  pour  nous  retirer  des  abysmes  et  gouffres  d'enfer:  Or,  avons-nous  confesse  cela?  Nous  cognoissons  aussi  que  nostre  Seigneur  Iesus  supplee  a  tous  nos  defauts.  Si  nous  sommes  souillez  et  pleins  d'ordures,  son  sang  est  nostre  lavement,  dont  nous  serons  nettoyez:  si  nous  sommes  plongez  en  dettes,  non  seulement  a  Dieu  mais  a  Satan,  comme  a  nostre  adversaire,  le  payement  a  este  fait  en  la  mort  et  passion  du  Fils  de  Dieu.  Si  nous  sommes  pollus  et  detestables,  le  sacrifice  que  nostre  Seigneur  Iesus  a  offert  est  de  bonne  odeur,  tellement  que  tout  le  mal  qui  est  en  nous,  est  efface.  Voyla  donc  comme  nous  sommes  iustifiez  par  la  cognoissance  de  nostre  Seigneur  Iesus  Christ.  Or  suyvant  ceste  doctrine,  en  premier  lieu  nous  voyons  qu'il  ne  nous  faut  point  chercher  loin  nostre  iustice,  d'autant  que  nous  la  trouverons  en  la  personne  de  nostre  Seigneur  Iesus  Christ,  selon  qu'il  a  vestu  nostre  nature,  et  s'est  fait  nostre  frere.  Et  ceci  est  de  grande  importance:  pource  que  si  nous  estions  iustifiez  par  l'essence  Divine  de  nostre  Seigneur  Iesus  Christ,  il  faudroit  que  nous  fussions  eslongnez  de  sa  iustice,  nous  n'y  pourrions  iamais  parvenir.  Mais  quand  il  est  dit  que  la  iustice  qu'il  nous  donne  a  este  accomplie  en  sa  nature  humaine,  voyla  comme  nous  pouvons  plus  priveement  venir  a  luy.  Et  voyla  aussi  pourquoy  Satan  a  voulu  brouiller  ceste  doctrine,  et  y  a  eu  des  fantastiques  qui  ont  resve  que  nostre  Seigneur  Iesus  iustifie  ses  fideles,  entant  qu'il  est  Dieu.  Mais  il  faudroit  (comme  i'ay  desia  dit)  chercher  nostre  iustice  bien  loin  :  et  ce  seroit  pour  nous  faire  perdre  courage  et  pour  nous  faire  esvanouir  devant  que  nous  fussions  parvenus  a  luy.  Mais  au  contraire  il  nous  appelle  a  soy,  entant  qu'il  s'est  fait  homme  mortel,  et  s'est  constitue  Mediateur,  a  ce  que  la  nous  cherchions  nostre  iustice.  Ainsi  voyla  un  poinct  que  nous  avons  a  observer:  et  au  reste  venons  tousiours  a  ceste  cognoissance.  Et  d'autant  que  les  incredules  se  ferment  la  porte,  et  se  privent  du  bien  qu'ils  doyvent  recevoir  par  nostre  Seigneur  Iesus  Christ,  que  nous  ayons  les  aureilles  attentives  pour  recevoir  le  tesmoignage  qui  nous  est  donne  en  l'Evangile.  Et  c'est  ce  que  dit  sainct  Paul  au  passage  que  nous  allegasmes  hier,  que  Iesus  Christ  qui  ne  scavoit  que  c'estoit  de  peche  a  este  fait  pecho  pour  nous:  et  qu'auiourd'huy  cela  s'accomplit  en  l'Evangile.  Nous  portons  l'ambassade  au  nom  de  Iesus  Christ