23:670  solution  est  bien  facile,  c'est  assavoir  que  Melchisedec  ne  peut  estre  separe  de  nostre  Seigneur  Iesus  Christ,  pource  qu'il  le  represente,  et  que  toute  l'excellence  qui  est  en  luy  depend  de  ce  qu'il  *est  la  figure  de  Iesus  Christ.  C'est  donc  par  bonne  raison  que  l'Apostre  monstre  que  luy,  auquel  appartient  le  droit  des  dismes  selon  la  Loy,  a  toutesfois  este  submis  a  Melchisedec.  Ainsi  de  la  il  faut  conclure,  que  nostre  Seigneur  Iesus  Christ  est  plus  excellent  beaucoup  que  n'a  este  Aaron,  ne  tous  ses  successeurs,  combien  qu'ils  fussent  la  comme  separez  du  reng  des  hommes.  Et  quand  le  Sacrificateur  estoit  revestu,  c'estoit  pour  monstrer  qu'il  estoit  comme  un  Ange  de  Dieu,  pouvant  approcher  de  sa  Maieste  :  estant  mediateur  pour  effacer  les  iniquitez  et  transgressions  du  peuple.  Combien  donc  que  tout  cela  fust,  neantmoins  l'Apostre  monstre  que  nostre  Seigneur  Iesus  Christ  l'a  surmonte  de  beaucoup  en  honneur,  et  qu'il  faut  qu'il  soit  exalte  par  dessus  toutes  les  figures  de  la  Loy,  et  qu'on  veoit  par  [pag.  73]  cela  qu'il  en  est  la  verite  et  la  substance.  Et  que  si  on  prenoit  tous  les  umbrages  qui  ont  este  en  usage  pour  un  temps,  qu'ils  ne  profiteroyent  rien,  et  que  tout  seroit  frivole  sinon  qu'on  vienne  au  vray  patron.  Notons  bien  donc  quand  Abram  a  offert  tous  les  dismes  a  Melchisedec,  que  c'a  este  desia  pour  monstrer  combien  que  Dieu  deust  establir  puis  apres  un  estat  de  Sacrificature  en  son  peuple,  que  ce  n'estoit  point  pour  deroguer  a  la  Sacrificature  de  nostre  Seigneur  Iesus  Christ,  laquelle  estoit  desia  figuree  en  la  personne  de  Melchisedec,  comme  elle  a  este  desia  establie  pour  lors.  Au  reste,  quant  est  d'offrir  des  dismes  aux  Sacrificateurs,  nous  voyons  que  desia  Abram  l'a  fait  devant  qu'il  y  eust  loy  escrite:  et  n'y  a  doute  que  l'Esprit  de  Dieu  ne  l'ait  induit  et  pousse  a  cela.  Car  Moyse  ne  recite  point  ici  une  chose  faite  a  la  volee  et  sans  raison,  mais  plus  tost  il  declaire  comme  Dieu  a  ratifie  l'office  de  ^Melchisedec,  d'autant  qu'il  l'a  voulu  instituer  son  Sacrificateur,  et  qu'Abram  luy  en  a  fait  recognoissance.  Mais  nous  ne  pouvons  pas  recueillir  de  cela  qu'il  y  en  ait  eu  loy  generale,  ne  que  les  fideles  se  fussent  obligez  a  payer  les  dismes,  sinon  d'autant  que  Dieu  l'a  aussi  institue  en  sa  Loy.  Ce  qu'il  a  fait  non  seulement  afin  qu'on  .luy  fist  hommage  des  biens  de  la  terre,  protestans  qu'ils  venoyent  de  sa  pure  liberalite:  ce  n'a  pas  este  simplement  a  [pag.  74]  ce  que  les  ministres  de  l'autel  fussent  nourriz,  c'est  a  dire  ceux  qui  servoyent  au  temple:  mais  il  y  avoit  qu'ils  estoyent  de  la  race  d'Abram.  Et  ainsi  une  partie  de  la  terre  leur  appartenoit,  et  devoyent  entrer  en  possession  d'icelle,  comme  il  avoit  este  dit  a  Abram:  Ta  semence  possedera  la  terre.  Levi  devoit  faire  un  chef  en  la  maison  d'Abram,  et  il  en  est  exclus:  et  la  maison  de  Ioseph  fait  deux  testes