50:67  67  EPIST.  PAULI  AD  CORINTHIOS  II  68  dissimulatione  eam  foveri  perniciosum  est.  Id  quia  facere  non  curaverant  Corinthii,  Paulus  in  posterum  admonet  quid  facere  debeant.  Gloriari  in  facie,  non  in  corde  est  externa  pompa  fucum  facere  et  pro  nihilo  ducere  cordis  sinceritatem.  Nam  qui  vere  cordati  erunt,  nunquam  nisi  in  Deo  gloriabuntur.  Ubi  autem  inanis  est  ostentatio,  illic  nulla  sinceritas,  nulla  animi  rectitudo.  13.  Nam  sive  insanimus,  Deo  insanimus:  sive  sani  sumus,  vobis  sani  sumus.  14.  Caritas  enim  Christi  constringit  nos:  iudicantes  illud,  quod  si  unus  pro  omnibus  mortuus  fuit,  ergo  omnes  sunt  mortui.  15.  Et  quidem  pro  omnibus  mortuus  est:  ut  qui  vivunt,  posthac  non  sibi  vivant,  sed  ei  qui  pro  omnibus  mortuus  est  et  resurrexit.  16.  Itaque  nos  posthac  neminem  novimus  secundum  carnem.  Quinetiam  si  secundum  carnem  novimus  Christum,  iam  non  amplius  novimus.  17.  Proinde  si  quis  in  Christo  nova  sit  creatura,  vetera  praeterierunt:  ecce,  nova  facta  sunt  omnia.  13.  Sive  insanimus.  Hoc  per  concessionem  dictum  est.  Sana  enim  erat  gloriatio  Pauli,  vel  sobria  et  sapientissima  insania,  si  ita  vocare  libet:  sed  quia  multis  videbatur  ineptus,  loquitur  ex  eorum  opinione.  Duo  autem  asserit:  se  nequaquam  habere  rationem  sui,  sed  hoc  unum  habere  propositum,  ut  Deo  et  ecclesiae  serviat:  deinde  nihil  se  vereri  hominum  opinionem,  quin  paratus  sit  insanus  haberi,  perinde  atque  sanus,  modo  negotium  Dei  et  ecclesiae  fideliter  agat.  Sensus  est  igitur,  quod  meam  integritatem  toties  praedico,  perinde  id  homines  accipient  ut  volent:  non  tamen  facio  mea  causa,  sed  Deum  tantum  et  ecclesiam  habeo  prae  oculis.  Paratus  ergo  sum  tacere  et  loqui,  prout  Dei  gloria  et  ecclesiae  utilitas  postulabit:  ac  libenter  patiar  ut  me  insanum  iudicet  mundus,  modo  non  insaniam  mihi,  sed  Deo.  Dignus  locus  non  observatione  modo,  sed  assidua  etiam  meditatione.  Nisi  enim  ita  compositi  animis  erimus,  minima  quaeque  offendicula  subinde  ab  officio  nos  abducent.  14.  Caritas  enim  Christi  Nomen  caritatis  tam  passive  quam  active  potest  accipi.  Malo  secundum.  Nisi  enim  plus  quam  ferrei  simus,  facere  non  poterimus  quin  totos  nos  devoveamus  Christo,  dum  reputamus  quanto  amore  nos  prosequutus  est,  quum  mortem  pro  nobis  subiit.  Et  Paulus  se  ipsum  exponit  dum  addit,  aequum  esse  ut  illi  vivamus,  nobis  mortui.  Ergo  quemadmodum  prius  dixerat  se  timore  sollicitari  ad  officium,  propterea  quod  reddenda  erit  semel  ratio  :  ita  nunc  ponit  alterum  stimulum,  illam  scilicet  immensam  dilectionem  Christi  erga  nos,  cuius  specimen  nobis  exhibuit  sua  morte.  Huius  inquam  amoris  agnitio  constringere  affectus  nostros  debet,  ne  alio  inclinent  quam  ad  eum  redamandum.