39:67  67  PRAELECTIONES  68  prophetas  et  omnes  bonos:  essent  etiam  pleni  avaritia  et  rapacitate:  alii  essent  libidinosi.  Quum  ergo  reges  foedati  essent  tot  flagitiis,  hic  promittitur  rex,  qui  officium  praestabit,  ut  scilicet  agnosci  possit  verus  Dei  minister.  Sed  interea  necesse  est  venire  ad  naturam  regni  Christi:  quia  scimus  esse  spirituale:  sed  depingitur  nobis  sub  imagine  terreni  et  politici  imperii,  quoties  enim  prophetae  loquuntur  de  Christi  regno,  proponunt  nobis  terrenam  imaginem,  quia  sine  ulla  figura  non  poterat  satis  intelligi  a  rudi  populo  in  illa  pueritia  spiritualis  veritas.  Non  mirum  igitur  est,  si  prophetae  quum  vellent  sermonem  suum  accommodare  Iudaeis,  de  regno  Christi  disseruerint,  ita  ut  proponerent  visibilem  eius  imaginem  in  terreno  et  politico  imperio,  ut  iam  diximus.  Sed  necesse  est  reputare  quale  sit  Christi  regnum.  Quum  ergo  sit  spirituale,  iustitia  et  iudicium  de  quibus  hic  propheta  loquitur,  non  pertinent  ad  ordinem  politicum  et  externum  duntaxat,  sed  potius  ad  rectitudinem,  qua  fit  ut  reformentur  homines  ad  imaginem  Dei,  quae  est  in  iustitia  et  veritate.  Dicitur  ergo  regnare  Christus  super  nos  in  iustitia  et  iudicio,  non  tantum  quia  legibus  nos  continet  in  officio  et  conservat  bonos  et  innoxios,  reprimit  audaciam  improborum:  sed  quia  nos  gubernat  spiritu  suo.  De  spiritu  autem  scimus  quid  Christus  ipse  pronuntiet  (Iohan.  16,  8),  Spiritus  iudicabit  mundum  de  iustitia  et  iudicio,  ete  Ergo  necesse  est  venire  ad  illam  spiritualem  iurisdictionem,  si  volumus  tenere  qualis  sit  iustitia  cuius  nunc  fit  mentio,  quale  item  iudicium  quod  adiungitur.  Postea  sequitur,  16.  Diebus  illis  servabitur  Iehudah,  et  Ierusalem  habitabitur  secure:  et  hoc  nomen  quo  vocabitur  ipsa1  Iehovah  iustitia  nostra.  Hic  extendit  propheta  regni  fructum  ad  omnes  Iudaeos,  et  ostendit  quantopere  expetendum  sit  regnum  illud  quod  pollicitus  est:  quia  scilicet  in  ipso  continebitur  perfecta  felicitas  et  salus.  Nisi  hoc  fuisset  additum,  poterat  frigere  quod  iam  vidimus  de  iusto  rege.  Interdum  enim  contingit,  ut  rex  colat  iustitiam  et  aequitatem  quantum  in  se  erit,  populus  autem  sub  ipso  sit  miser.  Sed  propheta  hic  testatur  populum  modis  omnibus  beatum  fore  ubi  ab  illo  rege  gubernabitur  quem  promisit  venturum.  Diebus  ergo  illis,  inquit,  servabitur  Iehudah.  Promittit  salutem  Iudaeis  :  quanquam  sub  hoc  nomine  complectitur  etiam  decem  tribus,  ut  saepe  fieri  solet.  Adiungit  Ierusalem  sed  eodem  sensu.  Ierusalem  habitabitur  secure,  inquit,  hoc  est  tranquilla  erit.  Haec  loquutio  sumpta  est  ex  Mose,  sicuti  prophetae  ubi  disserunt  de  benedictionibus  Dei  mutuari  solent  ex  fonte  illo  suam  doctrinam,  dicit  ergo  salvum  fore  populum:  deinde  tranquillum.