27:67  67  SERMON  LXXIII.  68  ennemi  mortel:  abstenons-nous  de  toute  iniure,  de  toute  extorsion  et  excez,  de  toute  fraude  et  malice  envers  ceux  qui  sont  ainsi  destituez  quant  au  monde,  qui  sont  desprouveus  de  moyens,  qui  sont  comme  exposez  en  proye,  ainsi  que  nous  avons  dit:  que  nous  ne  les  opprimions  point,  d'autant  que  Dieu  s'y  oppose,  et  qu'il  declaire  qu'il  sera  tousiours  leur  bouclier.  Voila  le  premier  fruict  que  nous  avons  a  recueillir  de  ceste  doctrine  qui  a  este  donnee  anciennement  aux  Iuifs  :  afin  que  si  nous  ne  craignons  point  la  vengeance  des  hommes,  que  nous  craignions  pour  le  moins  la  sentence  que  Dieu  prononce:  c'est  qu'il  ne  souffrira  point  que  les  povres  gens  ayent  este  molestez  a  tort,  qu'il  ne  se  declaire  de  leur  partie,  et  qu'il  ne  monstre  qu'il  a  prins  leur  cause  en  main  :  comme  il  est  dit  :  Qu'il  fera  droict.  Il  ne  dit  pas  seulement  qu'il  aime,  ou  qu'il  en  a  pitie:  mais  il  dit  qu'il  leur  fera  droict.  Si  donc  nous  voyons  que  les  Iuges  terriens  ne  facent  que  se  mocquer  des  povres  gens,  quand  ils  viennent  au  refuge  a  eux,  et  qu'ils  s'en  bavent  au  lieu  de  les  secourir:  cognoissons  qu'il  leur  faudra  venir  devant  le  Iuge  celeste,  qui  punira  bien,  et  ceux  ausquels  il  avoit  donne  commission  de  conserver  les  povres  gens,  et  puis  ceux  qui  se  sont  fiez  en  ceste  licence  qu'ils  avoyent  au  monde,  et  qui  se  sont  plus  addonnez  a  mal-faire,  quand  ils  ont  veu  que  cela  demeuroit  impuni.  Dieu  donc  regarde,  et  dissimule  pour  un  temps:  que  si  on  offense  les  povres  gens,  soyent  vefves,  soyent  orphelins,  soyent  estrangers:  il  est  vray  que  du  premier  coup  il  ne  se  dressera  pas,  mais  apres  qu'il  aura  bien  endure,  si  faut-il  qu'il  mette  la  main  sur  tous  ceux  qui  se  seront  ainsi  desbordez  a  faire  outrage  aux  foibles,  et  aux  petis,  et  sur  tout  ceux  qui  n'auront  point  fait  leur  office  quand  ils  estoyent  en  authorite  de  iustice,  ceux  qui  n'ont  point  secouru  les  povres  gens  quand  ils  estoyent  oppressez:  il  faut  que  Dieu  y  remedie,  et  qu'il  monstre  qu'ils  ont  este  lasches,  et  qu'il  s'addresse  aussi  bien  a  eux,  comme  a  ceux  qui  ont  corrompu  la  iustice,  quand  elle  leur  estoit  mise  en  main.  Voila  ce  que  Moyse  a  entendu,  en  disant  que  Dieu  fait  droict  a  ceux  qui  sont  foullez  iniustement,  et  ausquels  on  n'a  point  esgard  quant  au  monde.  Cependant  nous  avons  aussi  a  recevoir  une  grande  consolation  de  ce  passage:  que  si  nous  sommes  desprouveus  des  moyens  humains,  voici  nostre  Dieu  qui  nous  recoit,  et  mesmes  il  n'attend  pas  que  nous  venions  a  luy:  mais  il  prononce  qu'il  est  nostre  sauvegarde,  et  qu'il  veut  estre  nostre  tuteur.  Or  maintenant  si  les  povres  gens  sont  iniuriez,  et  qu'on  leur  face  beaucoup  d'exces,  et  qu'ils  soyent  quasi  foulez  au  pied:  n'ont-ils  pas  bien  dequoy  se  contenter,  sachans  que  Dieu  les  regarde  en  pitie,  et  qu'en  la  fin  ii  desployera  sa  main  forte  pour  les  secourir?