2:67  [CO  2.67]  quantam  Dominus  conservandi  verbi  sui  curam  habuerit,  quando  ipsum  ex  truculentia  saevissimi  tyranni,  quasi  ex  praesenti  incendio,  praeter  spem  omnium  eripuit;  quod  pios  sacerdotes  aliosque  tanta  constantia  instruxit,  ut  non  dubitaverint  thesaurum  hunc  vitae  suae  dispendio,  si  opus  foret,  redemptum  ad  posteros  transmittere;  quod  acerrimam  tot  praesidum  ac  satellitum  conquisitionem  frustratus  est.  Quis  insigne  ac  mirificum  Dei  opus  non  agnoscat,  quod  sacra  illa  monumenta,  quae  prorsus  interiisse  sibi  impii  persuaserant,  mox  quasi  postliminio  redierunt,  et  quidem  maiore  cum  dignatione?  Sequuta  est  enim  graeca  interpretatio  quae  per  totum  orbem  ea  vulgaret.  Neque  in  eo  tantum  apparuit  miraculum,  quod  foederis  sui  tabulas  Deus  a  sanguinariis  Antiochi  edictis  vindicavit,  sed  quod  inter  tam  multiplices  gentis  iudaicae  clades,  quibus  subinde  attrita  et  vastata,  mox  prope  ad  internecionem  redacta  fuit,  salvae  tamen  superstitesque  manserunt.  Lingua  hebraea  non  ignobilis  modo,  sed  prope  incognita  iacebat;  et  certe,  nisi  religioni  consultum  voluisset  Deus,  in  totum  periisset.  Quantum  enim,  ex  quo  reversi  sunt  ab  exsilio  Iudaei,  a  linguae  patriae  genuino  usu  desciverint,  ex  eius  saeculi  prophetis  apparet;  quod  ideo  notatu  utile  est,  quia  ex  hac  comparatione  clarius  elicitur  legis  et  prophetarum  antiquitas.  Et  per  quos  salutis  doctrinam  in  lege  et  prophetis  comprehensam  nobis  Deus  servavit,  ut  Christus  suo  tempore  patefieret?  Per  infestissimos  Christi  ipsius  hostes  Iudaeos;  quos  merito  ecclesiae  christianae  librarios  Augustinus  ideo  appellat,  quia  nobis  subministrarunt  lectionem  cuius  ipsi  usum  non  habent.  [Inst  1.8.11.]  Porro  si  ad  novum  testamentum  venitur,  quam  solidis  fulturis  nititur  eius  veritas?  Historiam  humili  abiectoque  sermone  tres  evangelistae  recitant.  Fastidio  est  multis  superbis  ista  simplicitas;  nempe  quoniam  ad  praecipua  doctrinae  capita  non  attendunt,  ex  quibus  colligere  facile  esset,  eos  supra  humanum  captum  de  coelestibus  mysteriis  disserere.  Certe  quicunque  ingenui  pudoris  gutta  praediti  erunt,  lecto  primo  capite  Lucae  pudefient.  Iam  Christi  conciones,  quarum  summa  a  tribus  illis  evangelistis  perstringitur,  omni  contemptu  eorum  scripta  facile  eximunt.  Ioannes  autem  e  sublimi  tonans,  quos  non  cogit  in  obsequium  fidei,  eorum  pervicaciam  quolibet  fulmine  validius  prosternit.  Prodeant  in  medium  omnes  isti  nasuti  censores,  quibus  summa  voluptas  est  scripturae  reverentiam  ex  suis  et  aliorum  cordibus  excutere.  Legant  Ioannis  evangelium:  velint  nolint,  illic  reperient  mille  sententias  quae  saltem  eorum  socordiam  expergefaciant;  imo  quae  eorum  conscientiis  ad  cohibendos  eorum  risus  horribile  inurant  cauterium.  Eadem  Pauli  et  Petri  ratio  est,  in  quorum  scriptis  quamvis  maior  pars  caecutiat,  ipsa  tamen  coelestis  maiestas  devinctos  sibi  omnes  et  quasi  constrictos  tenet.  Unum  vero  hoc