9:668  sanguis,  et  ieiunavit  quadraginta  diebus  et  quadraginta  noctibus  quum  accessit  divinitatem,  nec  esuriit:  hic  autem,  qui  erat  ipsemet  Deus,  quare  esuriit  caro  eius?  CALVINUS.  Quaere,  cur  angeli  apud  Abraham  comederint?  quomodo  vexati  fuerint  contumeliose  a  Sodomitis?  quomodo  dicat  Deus  Mosen  sibi  obstare,  ne  vindictam  quam  statuit  exerceat?  Nullius  apud  istos  porcos  momenti  solutio  est,  Christum  ideo  esuriisse,  quia  carnem  nostram  induens,  simul  famem  et  humanos  alios  affectus,  excepta  tantum  omni  corruptela,  induit.  Rationem  afferunt,  quia  non  idem  legatur  de  Mose.  Sed  an  putant  sanctum  prophetam  postea  rediisse  ad  solitum  victum,  nisi  eum  cogeret  naturae  infirmitas?  Luxuria  enim  alioquin  fuisset,  alimenta  superfluo  abusu  consumere.  Quid  do  Elia  quoque  sentiunt?  Nam  certe  quum  de  utroque  diserte  pronunciat  spiritus  quadraginta  diebus  ieiunasse,  satis  ostendit  non  longius  pertulisse  ipsos  inediam.  Christus  ergo  ad  praedicandum  evangelium  se  accingens,  exordium  a  ieiunio  quadraginta  dierum  fecit,  ne  Mose  vel  Elia  esset  inferior.  Ita  liquido  apparuit,  coelesti  virtute  eximi  a  necessitate  cibi  et  potus,  cui  subiecti  sunt  cuncti  mortales.  Sed  quia  non  minus  utile  erat,  fratrem  a  nobis  agnosci,  cui  nobiscum  humanae  vitae  conditio  esset  communis,  ad  ea  quae  propria  sunt  hominis,  statim  reversus  est.  Non  quod  in  eo  dominatae  sint  humanae  infirmitates,  nisi  quatenus  mero  suo  arbitrio  se  submisit,  ut  nobis  esset  similis.  XV.  IUDAEUS.  Quaere:  Si  agnus  paschatis  designabat  Iesum,  sequitur  multos  Iesus  nascendos  et  suspendendos.  Nam  non  praecepit  filiis  Israel,  ut  unum  tantum  agnum  paschatis  acciperent.  CALVINUS.  Quaere,  an  nihil  significaverat  omnes  victimae,  quae  in  templo  immolabantur?  Nam  si  ita  esset,  nihilo  praecellerent  aegyptiis  superstitionibus.  Deinde  scimus  Mosi  praeceptum  esse,  ut  omnia  formaret  ad  exemplar  quod  in  monte  videret  (Ex.  25,  40).  Atqui  divinum  illud  fuisse  negare  non  audebunt.  An  ideo  concedent  plures,  imo  innumeros  esse  deos?  Quaere  etiam,  quum  pascha  memoriale  et  pignus  fuerit  redemptionis,  an  totidem  fuisse  dicent  redemptiones,  quot  agnos  per  singulas  familias  Deus  iussit  mactari?