35:668  dit  qu'il  nous  faut  venir  a  Iesus  Christ:  voyla  pour  un  item.  Or  maintenant  il  est  vray  que  les  Philosophes  anciens  ont  assez  parle  de  vertu:  c'a  este  aussi  une  opinion  commune,  qu'il  faloit  estre  agreable  a  Dieu  en  bien  vivant:  mais  de  quoy  a  profite  tout  cela?  Car  les  meilleurs  d'entre  les  hommes,  et  ceux  qu'on  a  cuide  estre  irreprehensibles  du  tout,  n'ont  eu  qu'hypocrisie:  et  les  autres  ont  este  addonnez  a  tout  mal:  et  ceux  qu'on  a  pense  estre  les  plus  habiles  gens,  et  qui  estoyent  renommez  par  dessus  les  autres,  ont  eu  neantmoins  des  vices  enormes.  Ainsi  que  les  hommes  presument  tant  qu'ils  voudront,  et  qu'ils  pensent  comment  il  faut  vivre  vertueusement:  quand  ils  auront  fait  tout  ce  qu'ils  auront  peu,  et  quand  on  aura  mis  beaucoup  de  loix  et  de  regles  pour  les  conduire,  si  est-ce  que  iamais  par  ce  moyen  ils  ne  seront  iustes  devant  Dieu.  Et  pourquoy?  Pource  que  le  peche  est  enracine  en  nous,  et  ne  se  peut  pas  purger  par  remedes  humains.  Brief  nous  ne  serons  point  iustifiez  par  aller  a  l'eschole  des  hommes,  combien  qu'ils  enseignent  que  c'est  de  vertu.  Qui  plus  est,  voyla  Dieu  qui  publie  sa  Loy,  en  laquelle  la  vraye  et  parfaite  iustice  est  contenue:  comme  Moyse  proteste,  Voyci  ie  t'annonce  auiourd'huy  le  bien  et  le  mal:  ie  te  monstre  le  chemin  et  de  vie  et  de  mort.  Mais  cependant  nous  peut-elle  iustifier?  nous  peutelle  tellement  regler,  que  Dieu  accepte  nostre  vie  comme  bonne  et  saincte?  C'est  au  rebours:  car  la  Loy  n'engendre  que  mort,  elle  redouble  nostre  condamnation,  elle  enflambe  l'ire  de  Dieu.  Voyla  les  titres  qui  luy  sont  attribuez  en  l'Escriture  saincte.  Puis  qu'ainsi  est  donc  que  la  Loy  de  soy  no  nous  peut  iustifier,  comment  est-ce  que  les  hommes  pourront  par  leur  doctrine,  et  par  leurs  statuts  et  regles  nous  amener  a  une  vraye  iustice?  Or  si  on  demande  comment  la  Loy  de  Dieu  ne  peut  iustifier,  et  pourquoy:  la  raison  est  celle  que  i'ay  desia  touchee.  Il  est  vray  que  Dieu  nous  monstre  bien  en  sa  Loy  comment  nous  devons  et  pouvons  parvenir  a  la  vie,  si  nous  estions  tels  que  nous  n'eussions  nul  empeschement  de  nostre  coste.  La  Loy  de  Dieu  donc  parle,  mais  elle  ne  reforme  point  nos  coeurs.  Quand  Dieu  nous  monstre,  Voyla  ce  que  ie  demande  de  vous:  cependant  si  tous  nos  appetis,  nos  affections  et  nos  pensees  sont  contraires  a  ce  qu'il  commande,  non  seulement  nous  sommes  condamnez,  mais  la  Loy  comme  i'ay  dit  nous  rend  tant  plus  coulpables  devant  Dieu.  Car  auparavant  nous  eussions  peche  par  ignorance:  mais  maintenant  a  nostre  escient,  nous  resistons  a  Dieu,  tellement  qu'il  semble  que  nous  le  veuillions  despiter.  Car  nous  scavons  que  le  serviteur  qui  cognoist  la  volonte  de  son  maistre,  et  ne  la  fait  point,  sera  chastie  au  double.  Yoyla  pourquoy  il  est  dit  que