35:666  avons  veu  ci-dessus  que  cela  ne  derogue  point  a  la  maieste  de  nostre  Seigneur  Iesus  Christ:  car  combien  qu'il  fust  maistre  de  toutes  creatures,  si  est-ce  qu'il  a  acquis  encore  un  empire  nouveau  en  la  personne  de  Mediateur,  et  en  nostre  nature:  selon  que  S.  Paul  en  traitte  au  2.  chapitre  des  Philippiens,  et  nous  l'avons  desia  veu  en  partie:  tant  y  a  qu'il  s'est  voulu  faire  serviteur  et  s'humilier  sous  ceste  condition-la.  Ainsi  ce  n'est  pas  en  vain  qu'il  est  appele  serviteur  de  Dieu.  Et  ne  devons  pas  trouver  cela  estrange:  car  il  est  bien  plus  estrange  que  Iesus  Christ  soit  serviteur  des  hommes,  le  Fils  de  Dieu,  celuy  qui  a  eu  une  gloire  pareille  avec  son  Pere  (comme  il  en  est  parle  au  17.  chapitre  de  S.  Iehan)  que  celuy-la  s'abbaisse  iusques  a  ceste  condition  de  nous  vouloir  servir  :  neantmoins  il  en  est  ainsi.  Et  voyla  aussi  pourquoy  il  dit,  Ie  suis  et  converse  entre  vous  comme  celuy  qui  sert,  et  non  pas  qui  ha  maistrise.  Or  puis  qu'ainsi  est  que  Iesus  est  descendu  iusques  la  de  se  faire  serviteur  des  hommes,  ce  n'est  point  sans  cause,  qu'il  est  yci  appele  serviteur  de  Dieu.  Et  de  faict,  il  ne  pouvoit  autrement  nous  racheter,  ie  di  selon  le  decret  de  Dieu  son  Pere:  comme  nous  avons  desia  declare  ci  dessus.  Car  sans  nul  moyen  Dieu  nous  pouvoit  bien  sauver,  mais  nous  avons  tousiours  a  presupposer  qu'il  faloit  que  la  vie  nous  fust  acquise  par  Iesus  Christ.  Or  pour  ce  faire,  il  faloit  quant  et  quant  qu'il  fust  serviteur:  car  il  ne  pouvoit  pas  autrement  rendre  obeissance  a  Dieu  son  Pere:  et  sans  ceste  obeissance-la,  il  ne  pouvoit  reparer  nos  transgressions  et  iniquitez.  Voyla  donc  pourquoy  notamment  il  est  appele  Serviteur,  voire  et  iuste.  Brief,  le  Prophete  signifie,  d'autant  que  nous  avons  este  rebelles  a  Dieu,  et  le  sommes  encores,  iusques  a  ce  qu'il  nous  ait  reformez  par  son  S.  Esprit:  et  encores  apres  qu'il  nous  a  touchez  d'une  bonne  affection,  nous  sommes  serviteurs  inutiles,  et  fourchons  a  chaque  pas:  et  quand  il  aura  semble  que  le  service  que  nous  luy  rendons  devra  bien  estre  accepte  de  luy,  il  y  aura  tousiours  a  redire,  mesmes  il  merite  d'estre  reiette  :  il  a  fallu  pour  effacer  nos  defauts  que  le  service  et  l'obeissance  de  nostre  Seigneur  Iesus  Christ  fust  plaisante  a  Dieu  :  comme  aussi  elle  emporte  droite  satisfaction,  voyla  en  somme  ce  qu'il  a  voulu  dire.  Et  de  la  nous  avons  a  recueillir  que  Iesus  Christ  nous  a  iustifiez,  non  pas  seulement  entant  qu'il  estoit  Dieu,  mais  en  la  vertu  de  son  obeissance,  en  ce  qu'il  a  pris  nostre  nature,  et  en  icelle  a  voulu  accomplir  la  Loy  qui  nous  estoit  impossible  et  estoit  un  fardeau  pour  nous  accabler  tous,  et  nous  rompre  le  col.  D'autant  donc  que  nostre  Seigneur  Iesus  Christ  s'est  demis  pour  nostre  salut,  et  a  este  obeissant  a  Dieu  son  Pere,  voyla  comme  nous  sommes  iustifiez  par  luy.