9:664  suam,  ut  non  perirent  homines  huius  aetatis?  Maior  enim  est  numerus  eorum  qui  pereunt  propter  huius  ignorantiam,  quam  eorum  qui  redempti  sunt.  Obscuritate  enim  separantur  ab  illo,  ne  in  illum  credant.  CALVINUS.  Quaere  vicissim,  cur  Deus  qui  coelos  inhabitat,  voluerit  latere  inter  Cherubim?  et  cur  sibi  domicilium  sub  pellibus  elegerit?  cur  sacrum  foederis  sui  symbolum  insculpi  voluerit  pudendis  hominum  membris?  cur  elegerit  regem  populo  suo  ex  tugurio  ignobili  et  caulis  ovium,  qui  etiam  domi  suae  contemptus  ab  aliis  respueretur?  cur  obscurum  et  tenuem  rivulum  Siloe  potius  elegerit,  quam  celebres  ac  rapidos  fluvios  (Isa.  8,  6)?  et  Iudaeis  exprobret,  quod  externae  magnitudinis  pompam  appetant?  Facile  autem  refellitur  eorum  petulantia  Isaiae  verbis,  qui  Messiam  proponit  deformem  multisque  probris  foedatum,  ac  sine  ullo  decore  plagis  afflictum,  et  divinitus  humiliatum,  a  quo  fere  omnes  oculos  avertant  (Isa.  53,  4.  5.  6),  Certe  quin  Messias  viva  sit  imago  gloriae  Dei,  non  audebunt  Iudaei  negare.  Qui  fit  ergo  ut  rex,  per  cuius  manum  potentiam  suam  exserere  vult  Deus,  tam  sordidus,  imo  instar  leprosi  deformis  prodeat?  Belluae  autem  istae  pro  sua  superbia  Deum  ad  leges  suas  adigere  cuperent.  Quasi  vero  vel  non  viderit  quid  optimum  esset  factu,  vel  per  incogitantiam  praedixerit  sibi  ita  placere.  Atqui  pietatis  sobrietas  hoc  saltem  requirit,  ut  Dei  arbitrio  longe  plus  deferant  homines,  quam  propriae  imaginationi.  Oblatrant  isti  canes,  perire  maiorem  hominum  partem,  quia  Christi  obscuritate  offensi  ab  eo  abhorreant:  quasi  frustra  exclamet  Isaias  (53,  1)  obscuram  fore  eius  notitiam,  quia  paucis  revelabitur  Dei  virtus.  Et  tamen  verum  est  quod  docet  apostolus,  refulsisse  in  eo  gloriam  unigenito  Dei  filio  dignam  (Ioann.  1,  14).  Verum  est  etiam  evangelium,  in  quo  refulget  coelestis  Dei  maiestas,  non  esse  obscurum  nisi  reprobis  qui  pereunt.  Mirum  autem  est  cur  querantur  non  magis  conspicuum  fuisse  Dei  fulgorem  in  Christo,  quorum  patribus  tolerabilis  non  fuit  aspectus  Mosis,  donec  velata  esset  eius  facies.  X.  IUDAEUS.  Quaere:  Quemadmodum  fuit  Iona  in  visceribus  piscis  tribus  diebus  et  tribus  noctibus,  sic  fuit  Iesu  in  terra  tribus  diebus  et  tribus  noctibus.  Hoc  non  est  verum.  Nam  etiam  secundum  verba  vestra  fuit  tantum  in  terra  tribus  diebus  et  duabus  noctibus.