49:664  prend  de  faire  ainsi  un  divorce,  c'est  comme  si  elle  deschiroit  par  pieces  le  Fils  de  Dieu.  Et  en  cela  voit  on  comme  le  diable  a  regne  avec  une  telle  furie  en  la  Papaute,  qu'il  n'y  a  plus  eu  nulle  discretion,  qu'on  n'a  regarde  a  rien  qui  fust.  Et  pourtant  nous  devons  bien  recognoistre  que  c'a  este  d'une  bonte  admirable  de  Dieu,  que  quand  nous  avons  este  retirez  d'un  tel  abysme:  et  faut  bien  que  nous  facions  nostre  profit  du  thresor  duquel  Dieu  veut  que  nous  iouissions.  Cependant  nous  avons  aussi  a  noter,  quand  sainct  Paul  dit  qu'on  benit  le  calice,  qu'il  entend  qu'il  est  sanctifie  pour  nous  estre  un  tesmoignage  et  comme  une  arre  de  ceste  grace  spirituelle:  c'est  a  scavoir  que  nous  vivons  en  Iesus  Christ,  d'autant  qu'il  nous  incorpore  en  luy,  et  que  nous  sommes  faits  un  avec  luy.  Il  est  vray  qu'aucuns  prenent  ce  Benir-ci,  pour  rendre  graces:  mais  contre  toute  raison  :  car  sainct  Paul  ne  dit  pas  qu'avec  le  calice  on  rend  graces,  ou  le  calice  par  lequel  on  benit:  mais  il  dit  que  le  calice  est  benit.  Cela  donc  ne  se  peut  exposer,  sinon  d'autant  qu'il  est  dedie  a  cest  usage:  que  la  nous  soyons  certifiez  que  nostre  Seigneur  Iesus  Christ  se  donne  a  nous,  et  que  le  sang  qu'il  a  une  fois  espandu  pour  nostre  redemption,  est  fait  nostre  lavement,  et  que  nos  macules  en  sont  purgees  devant  Dieu.  Voyla  en  somme  ce  que  nous  avons  a  retenir.  Mais  encore  pour  en  avoir  intelligence  plus  facile,  notons  que  nous  benirons  bien  les  viandes  dont  nous  serons  tous  les  iours  repeus  quant  au  corps:  en  priant  Dieu,  nous  benissons  et  le  boire  et  le  manger  qui  est  la  pour  nostre  refection.  Il  est  vray  que  Dieu  les  a  benis  en  les  creant:  mais  il  est  question  que  l'usage  nous  en  soit  pur  quant  a  nous.  Et  comment  cela  se  fera-il?  S.  Paul  declare  que  toutes  choses  nous  sont  pures,  d'autant  qu'elles  nous  sont  sanctifiees  par  la  priere  et  par  la  foy.  Quand  un  homme  se  voudra  gouverner  comme  un  pourceau,  il  est  certain  qu'il  se  souille  en  abusant  des  biens  que  Dieu  luy  offroit  pour  sa  nourriture,  et  souille  quant  et  quant  les  biens  de  Dieu.  Car  c'est  une  pollution,  quand  nous  venons  ainsi  souiller  ce  que  Dieu  nous  vouloit  estre  tesmoignage  de  sa  bonte  et  de  son  amour,  et  du  soin  paternel  qu'il  ha  de  nous.  Voyla  comme  au  dernier  iour  les  incredules  rendront  conte  d'avoir  ainsi  pollue  les  choses  sainctes  quand  ils  ont  ainsi  gourmande  les  biens  de  Dieu  sans  luy  en  faire  nul  hommage.  Or  a  l'opposite  sainct  Paul  dit  que  les  viandes  nous  sont  sanctifiees  quand  nous  cognoissons  qu'elles  nous  procedent  de  la  bonte  de  Dieu,  et  que  la  dessus  nous  recourons  a  luy,  et  luy  demandons  nostre  pain  quotidien,  et  qu'il  nous  gouverne,  puis  que  nous  sommes  nourris  et  sustentez  a  ses  despens.  Voyla  comme  une  bene-