23:663  663  SERMONS.  664  auiourd'huy  revele  en  l'Evangile.  Or  il  est  vray  qu'il  y  a  benediction  commune.  Car  Benir,  en  l'Escriture  saincte  se  prend  souventesfois  pour  prier  :  comme  nous  verrons  cy  apres,  qu'un  homme  vulgaire  benit  un  autre  en  disant,  Dieu  te  benie:  comme  quand  nous  saluons  les  uns  les  autres,  ce  sont  benedictions,  c'est  le  stile  commun  de  l'Escriture  sainte.  Mais  il  y  a  une  benediction  singuliere,  qui  est  reservee  aux  Sacrificateurs.  Et  voila  pourquoy  souvent  il  est  dit  en  la  Loy,  Les  Sacrificateurs  qui  benissent  le  peuple  au  nom  de  Dieu,  c'est  a  dire  qui  ont  ceste  authorite-la.  Et  mesme  la  forme  nous  en  a  este  donnee  au  6.  chapitre  [pag.  58]  des  Nombres,  quand  il  est  dit:  Voila  comme  les  Sacrificateurs  beniront  mon  peuple,  Le  Seigneur  vous  benisse  et  conserve,  le  Seigneur  face  luire  sa  face  sur  vous:  et  puis,  Le  Seigneur  vous  soit  favorable,  et  vous  donne  paix.  Voila  un  formulaire  que  Dieu  a  mis  en  son  Eglise.  Et  c'est  pourquoy  aussi  il  est  dit,  quand  Iesus  Christ  est  monte  au  ciel,  qu'il  a  esleve  les  mains  sur  ses  Apostres  comme  les  Sacrificateurs  faisoyent:  afin  d'accomplir  les  figures  de  la  Loy,  en  benissant  ses  disciples.  C'est  donc  la  benediction  dont  il  est  ici  parle.  Et  voila  pourquoy  l'Apostre  n'argue  point  sans  cause,  qu'il  a  fallu  que  Melchisedec  en  ceste  qualite  fust  plus  excellent  qu'Abram,  puis  qu'il  l'a  benit.  Or  Abram  est  le  Pere  de  toute  l'Eglise.  Concluons  donc  que  nostre  Seigneur  Iesus  Christ  a  une  maieste  plus  qu'humaine,  et  mesmes  en  la  personne  du  Mediateur.  Il  faut  encores  que  toute  hautesse  s'abaisse  souz  luy,  et  que  chacun  y  regarde,  que  grans  et  petis  cognoissent  que  l'Empire  souverain  luy  est  donne  de  Dieu  son  Pere,  voire  en  ceste  nature  humaine,  et  que  devant  luy  il  faut  que  tout  genouil  se  ploye.  Car  voila  comme  ce  passage  de  sainct  Paul  au  2.  des  Philip,  doit  estre  entendu.  Et  c'est  ce  que  nous  avons  a  retenir.  Maintenant  il  reste  d'appliquer  ce  passage  a  nostre  utilite,  c'est  que  nous  ne  doutions  point  comme  nostre  pere  [pag.  59]  Abram  a  este  benit  en  figure  par  Melchisedec,  qu'auiourd'huy  nostre  Seigneur  Iesus  Christ,  qui  est  le  Sacrificateur  eternel,  nous  benit  au  nom  de  Dieu  son  Pere.  Car  ceste  priere  ici  n'est  pas  vaine,  il  faut  qu'elle  ait  son  effect,  nous  savons  qu'il  ne  peut  faillir  d'estre  exauce.  Concluons  donc  qu'en  mettant  nostre  fiance  en  Iesus  Christ,  nous  l'avons  pour  advocat  envers  Dieu  son  Pere:  si  nous  sommes  maudis  en  Adam,  et  que  nous  acquerions  encores  iournellement  malediction  nouvelle  par  nos  fautes  et  transgressions,  toutesfois  que  cela  sera  efface  et  repare,  par  ce  que  nostre  Seigneur  Iesus  Christ  daigne  bien  prendre  l'office  de  nous  benir.  Et  mesme  nous  voyons  la  priere  qu'il  a  faicte  pour  un  coup,  au  17.  chapitre  de  sainct  Iehan.  Pere  Sainct  ie  te  prie  non  seulement  pour  ceux-ci  (c'est  a  dire  les  unze  Apostres