49:660  tifiant  aux  hommes,  vous  avez  prins  conge  d'offenser  Dieu,  et  faire  contre  vostre  devoir.  Nous  voyons  donc  que  sainct  Paul  donnant  aux  Corinthiens  l'authorite  de  iuger,  leur  fait  plus  de  vergongne:  d'autant  qu'en  cela  nous  coignoissons  que  ils  n'ont  pas  este  du  tout  ignorans:  mais  se  sont  endormis  comme  en  leur  escient,  et  que  le  monde  les  a  par  trop  occupez  et  retenus:  et  que  cependant  ils  ont  offense  Dieu,  combien  que  ce  qu'ils  faisoyent  leur  eust  este  assez  cognu,  ils  n'ont  point  fait  semblant  de  rien.  Et  ainsi  apprenons,  selon  que  nostre  Seigneur  maintenant  nous  donne  plus  de  cognoissance,  qu'il  y  aura  tant  moins  d'excuse  pour  nous,  et  que  nostre  condamnation  sera  double  et  beaucoup  plus  grieve  :  car  nous  devons  iuger  les  autres,  et  il  faudra  que  nous  soyons  condamnez,  non  point  comme  gens  qui  ayons  failli  par  erreur,  mais  qui  auront  despite  Dieu,  et  estouffe  la  clarte  quand  elle  luisoit,  et  qui  aurons  tasche  de  l'esteindre  du  tout.  Faisons  donc  valoir  la  cognoissance  que  Dieu  nous  donne,  et  appliquons-la  a  son  usage:  car  nous  n'aurons  pas  tousiours  ce  bien  que  nostre  Seigneur  nous  advertisse  de  sa  bonne  volonte.  Or  cependant  notons,  que  la  ou  l'Evangile  aura  este  presche  quelque  temps,  le  peuple  ne  doit  pas  estre  rude  ne  ignorant  des  choses  qui  sont  communes  a  tous  enfans  de  Dieu:  comme  quand  il  est  question  de  prier  Dieu,  de  scavoir  ou  gist  la  certitude  de  nostre  salut,  de  scavoir  que  c'est  de  foy  et  de  repentance,  et  puis  quelle  est  la  vertu  et  l'usage  des  Sacremens.  Ces  choses  la  donc  nous  doyvent  estre  toutes  familieres:  et  sainct  Paul  le  monstre,  quand  il  dit,  Ie  parle  a  gens  entendus.  Pourquoy  dit-il  que  les  Corinthiens  sont  bien  avisez,  et  qu'ils  ont  eu  une  instruction  suffisante?  C'est  quant  a  la  Cene  de  nostre  Seigneur  Iesus  Christ.  Il  est  vray  que  la  Cene  est  un  secret  haut  et  admirable  :  mais  si  fautil  que  nous  ayons  les  aureilles  batues  de  ce  que  nostre  Seigneur  Iesus  Christ  nous  a  la  institue,  que  nous  scachions  (di-ie)  pourquoy  la  Cene  nous  est  donnee,  quel  profit  nous  en  recevons,  a  quelle  fin  nous  applicquons  le  pain  et  le  vin  qui  nous  sont  la  offerts.  Si  cela  ne  nous  est  cognu,  nous  monstrons  que  nous  avons  par  trop  mal  profite  en  l'Evangile.  En  somme  apprenons  que  c'est  la  vraye  marque  de  l'Eglise  de  Dieu,  que  les  choses  qui  sont  communes  a  tous  fideles,  ou  doyvent  estre,  nous  soyent  priveement  enseignees,  et  que  chacun  en  puisse  rendre  raison.  Et  de  la  on  peut  iuger  qu'en  la  Papaute  l'Eglise  a  este  du  tout  abolie:  comme  nous  voyons  aussi  qu'il  y  a  la  une  bestise  si  grande,  que  nul  ne  scaura  que  c'est  de  prier  Dieu  au  nom  de  nostre  Seigneur  Iesus  Christ,  nul  ne  le  scaura  nommer  son  Sauveur,  pour  dire  comment  c'est  que  Iesus  Christ  nous  a  reconciliez  a  Dieu  son  Pere,  tellement  que  nous  soyons  asseurez  par  sa  grace  d'estre