52:66  acceptum,  et  oblatum  in  odorem  bonae  fragrantiae.  Quid  enim  optari  potest  melius  quam  ut  beneficia  sacrae  sint  oblationes,  quas  Deus  e  manibus  nostris  accipiat,  et  quarum  odore  delectetur?  Eadem  ratione  dicit  Christus,  quidquid  feceritis  uni  ex  minimis  istis  nomine  meo,  mihi  fecistis.  Sed  metaphora  sacrificiorum  multum  addit  ponderis:  qua  docemur^  non  modo  hominibus  impendi  quod  Deus  mandat  caritatis  officium,  sed  spiritualem  sacrumque  ipsi  Deo  cultum  praestari.  Sicut  in  epistola  ad  Hebraeos  habetur,  talibus  hostiis  rite  litari.  Vae  autem  nostrae  ignaviae,  quod  quum  Deus  ad  sacerdotii  honorem  tam  benigne  nos  invitet,  sacrificia  etiam  in  manum  porrigat:  neque  illi  sacrificamus,  et  quae  destinata  erant  ad  sacras  oblationes,  non  tantum  consumimur  in  usus  profanos,  sed  flagitiose  prodigimus  iu  pollutissimas  corruptelas.  Arae  enim  quibus  imponi  debebant  ex  facultatibus  nostris  sacrificia,  pauperes  sunt  et  servi  Christi.  Illis  neglectis,  alii  in  luxum  omne  genus,  alii  in  gulam,  alii  in  lenocinia,  alii  in  palatia  dissipant.  19.  Deus  autem  meus  implebit.  Alii  legunt:  Impleat,  in  optativo:  quod  tametsi  non  reiicio,  magis  tamen  probo  alteram  lectionem.  Nominatim  Deum  vocat  suum,  quia  ille  sibi  factum  imputat  et  agnoscit  quidquid  servis  suis  praestatur.  Vere  ergo  in  agro  Domini  seminaverant,  unde  speranda  erat  certa  et  copiosa  messis.  Neque  tantum  in  futura  vita  mercedem  illis  promittit,  sed  etiam  quoad  usus  praesentis  vitae.  Ac  si  diceret:  Ne  putetis  vos  opibus  imminutos  :  Deus,  cui  servio,  abunde  sufficiet  quidquid  vobis  opus  erit.  Particula  in  gloria  resolvi  debet  in  adverbium  gloriose,  pro  magnifice,  aut  splendide.  Sed  addit  per  Christum,  cuius  nomine  gratum  Deo  est  quidquid  facimus.  20.  Porro  Deo  et  patri.  Potest  generalis  esse  gratiarum  actio,  qua  claudat  epistolam:  vel  specialiter  ad  proximum  membrum  de  liberalitate  Paulo  impensa  referri.  Nam  quod  illi  subvenerant  Philippenses,  ita  debuit  illis  referre  acceptum,  ut  agnosceret  subventum  sibi  esse  Dei  misericordia.  22.  Salutans  vos.  In  salutationibus  primos  nominat  suos  contubernales,  postea  omnes  sanctos  in  genere:  hoc  est,  totam  romanam  ecclesiam,  sed  praecipue  domesticos  Neronis.  Quod  observatu  dignum  est.  Neque  enim  vulgare  specimen  est  divinae  misericordiae,  quod  evangelium  in  illam  scelerum  omnium  et  flagitiorum  abyssum  penetraverit.  Ac  eo  quidem  admirabilius,  quo  rarius  est  exemplum,  sanctitatem  in  aulis  regnare.  Quod  nonnulli  coniectarunt,  hic  Senecam  inter  alios  designari,  nihil  habet  coloris.  Nam  neque  ullo  unquam  vel  minimo  indicio  se  Christianum  esse  probavit.  Neque  erat  ex  domo  Caesaris,  sed  senator  et  praeterius.  Calvini  opera.  Val.  LII.