42:66  n'en  ouit  parler,  voila  comme  chacun  se  retire,  et  ce  seroit  le  temps  d'invoquer  le  nom  de  Dieu,  de  perseverer  en  la  lecture,  et  en  instructions,  et  incitations  mutuelles.  Ainsi  donc  ceux  qui  ont  connoissance  de  l'Evangile,  telle  qu'il  appartient  suivent  ce  qui  est  ici  remonstre,  c'est  a  scavoir,  que  quand  les  ennemis  de  la  foy  enragent  le  plus,  et  qu'ils  auront  comme  la  bride  avallee,  qu'il  faut  que  les  enfans  de  Dieu  se  fortifient  d'autant  mieux,  et  qu'ils  prennent  courage  plus  que  iamais:  voila  donc  quant  a  cette  sentence,  ou  il  est  dit,  que  les  prudens  du  peuple  donneront  instruction  a  plusieurs,  et  cependant  qu'ils  trebuscheront  a  l'espee,  au  feu,  en  captivite,  et  en  proie  par  plusieurs  iours.  Or  outre  la  doctrine,  l'exemple  aussi  nous  doit  profiter,  car  ce  qui  est  ici  annonce  par  l'ange  devoit  servir  a  tous  les  fideles  de  ce  temps  la,  de  les  soliciter  pour  batailler  avec  une  tant  plus  grande  magnanimite  et  constance.  Comment?  Puis  que  Dieu  nous  appele  a  ceci,  voire  et  qu'il  l'ha  predit  qu'ainsi  il  adviendroit,  faut-il  que  nous  falsifions  les  propheties?  Nenni  non,  mais  puis  qu'ainsi  est  que  Dieu  nous  appele  a  cela,  et  qu'il  nous  fait  la  grace  que  nous  avons  plus  de  scavoir  que  le  commun  peuple,  c'est  a  fin  que  nous  allions  les  premiers,  c'est  a  fin  que  nous  monstrions  aux  autres  ce  que  nous  avons  a  faire  maintenant,  outre  la  doctrine,  nous  avons  ce  que  nous  ont  monstre  par  effect  les  saincts  Peres,  car  il  est  recite  en  l'histoire  des  Macabees,  comme  Dieu  ha  suscite  aucuns  personnages  qui  ont  este  invincibles  contre  les  tirans,  ils  n'ont  point  este  esbranles  pour  quelques  tourmens  que  leur  feist  Antioche  par  ses  officiers,  et  par  ses  bourreaux  qu'il  envoioit,  qu'ils  n'ont  point  refuse  de  venir  a  la  mort,  puis  qu'ils  ont  conneu  que  telle  estoit  la  volonte  de  Dieu.  Ainsi  donc  combien  que  les  edits  fussent  si  cruels,  qu'il  sembloit  qu'il  eust  este  impossible,  qu'on  ne  fust  contraint  de  les  observer,  que  neantmoins  tout  cela  n'ha  point  empesche  que  ceux  ici  n'aient  eu  une  constance  si  grande,  qu'ils  ont  mesprise  tout  ce  qui  avoit  este  commande  par  le  Roy  Antioche,  pour  maintenir  la  gloire  de  Dieu.  Et  bien,  n'estoit-il  question  que  d'aller  a  la  mort?  ils  y  alloient,  et  ce  qui  nous  en  est  ainsi  recite  ne  nous  doit-il  pas  servir  de  confirmation  ?  Il  est  bien  certain,  et  non  seulement  pour  un  temps,  mais  tant  qu'il  y  aura  Eglise  de  Dieu  au  monde.  Ainsi  donc  aprenons  auiourd'huy  de  nous  fortifier,  non  seulement  par  ce  qui  nous  est  declare  par  la  bouche  de  l'ange,  mais  par  ce  que  nous  pouvons  contempler  en  ce  que  les  saincts  Peres  ont  fait,  car  ils  crieront  vengeance  a  l'encontre  de  nous  devant  Dieu,  si  nous  ne  les  ensuivons,  leur  intention  ha  este  telle  de  nous  accompagner  avec  eux,  et  comme  ils  sont  alles  devant,  de  nous  mener  apres,  et  que  nous  ne  facions  point  de  dificulte  da  5