27:66  un  povre  orphelin,  une  vefve,  ou  un  estranger,  que  nous  ne  ferions  point  d'avoir  offense  ceux  qui  sont  les  mieux  apparentez,  et  qui  ont  les  moyens  de  se  revenger  selon  le  monde.  Mais  quoy?  nostre  incredulite  se  declaire  en  cest  endroict:  que  si  un  homme  est  riche  et  puissant,  s'il  est  bien  appuye,  nous  n'osons  pas  luy  resister:  et  encores  qu'il  nous  ait  fait  quelque  iniure,  si  est-ce  que  nous  humons  cela  tout  doucement,  et  n'osons  pas  nous  en  plaindre,  tant  s'en  faut  que  nous  ayons  le  bras  leve  pour  ruer  dessus:  mais  nous  n'attendons  pas  qu'un  povre  homme  nous  face  tort  et  violence,  nous  sommes  la  les  premiers  aggresseurs.  Et  pourquoy?  Car  nous  ne  craignons  point  qu'ils  nous  rendent  la  pareille,  ils  n'oseroyent  gronder  :  et  s'ils  attentent,  nous  les  pouvons  rembarrer:  et  qui  estu?  Il  n'obtiendra  nul  droict  en  la  iustice.  Et  puis  s'il  est  la,  encores  a-il  moins  de  moyen.  Nous  craindrons  donc  les  hommes  quand  ils  seront  armez  de  quelque  pouvoir:  mais  cependant  nous  ne  craignons  point  Dieu,  lequel  se  declaire  estre  le  protecteur  des  povres  gens  qui  sont  destituez  de  toute  aide.  Si  nous  adioustions  foy  a  l'Escriture  saincte,  il  est  certain  que  ceste  seule  sentence  de  Moyse  seroit  pour  nous  estonner  beaucoup  plus  que  toutes  les  considerations  mondaines  que  nous  pourrions  avoir.  Au  contraire,  quand  nous  sommes  si  hardis  de  tourmenter  les  povres  gens,  c'est  signe  que  nous  ne  croyons  rien  de  tout  ce  qui  est  contenu  en  l'Escriture  saincte,  et  que  nous  sommes  pires  que  Payens.  Et  toutesfois  ceste  facon-la  est  commune  au  monde.  Mais  par  cela  voit-on  que  l'infidelite  est  comme  un  deluge  qui  occupe  auiourd'huy  toute  la  terre.  Vray  est  que  c'est  une  chose  horrible:  mais  si  est-ce  que  cela  est,  et  ne  le  peut-on  pas  nier.  Que  fautil  donc?  Regardons  a  nous:  car  si  les  armoiries  d'une  republique,  ou  d'un  Prince  sont  en  une  maison,  ou  en  une  terre,  on  n'osera  pas  y  attenter:  car  ce  seroit  violer  la  sauvegarde,  ce  ne  seroit  pas  mesmes  une  offense  privee.  Or  voici  Dieu  qui  met  ses  armoiries  sur  les  vefves,  sur  les  orphelins,  et  sur  les  estrangers,  et  dit  qu'il  les  a  receus  en  sa  protection:  et  on  s'ira  ruer  la  dessus  pour  les  molester,  et  leur  faire  tous  outrages,  n'est-ce  point  despitter  tout  manifestement  Dieu,  et  le  desfier  pour  luy  faire  la  guerre?  Il  est  vray  que  nous  ne  l'estimerons  pas:  mais  si  est-ce  que  Dieu  ne  se  remettra  point  aussi  a  nostre  vaine  opinion  et  phantasie.  Quoy  qu'il  en  soit  notons  bien,  que  si  les  vefves  sont  reiettees  du  monde,  si  les  orphelins  sont  comme  exposez  en  proye,  si  les  povres  estrangers  sont  mocquez  et  foullez  au  pied:  qu'ils  ne  laissent  pas  d'estre  prisez  de  Dieu,  et  que  c'est  la  ou  il  a  ses  yeux  iettez,  et  qu'il  les  veut  maintenir.  Et  pour  ceste  cause  si  nous  ne  voulons  avoir  Dieu  pour  nostre  partie  adverse,  qu'il  se  declaire  nostro  5