26:66  faire  reposer  son  peuple.  Puis  qu'ainsi  est  donc  que  ceste  terre-la  estoit  comme  en  la  main  de  Dieu  :  faut-il  que  Moyse  se  vante  de  l'avoir  donnee?  Or  il  ne  nous  faut  point  trouver  ceci  estrange:  car  les  serviteurs  de  Dieu,  quand  ils  parlent  ainsi,  ne  s'attribuent  rien:  mais  ils  monstrent  a  quoy  ils  sont  commis,  quelle  charge  leur  est  donnee:  et  par  ce  moyen  ils  ne  se  separent  point  d'avec  Dieu.  Quand  un  homme  sera  envoye  d'un  prince,  et  qu'il  aura  toute  authorite  de  faire  ce  qui  luy  est  commis  en  charge,  il  prendra  le  nom  du  prince  comme  par  emprunt:  il  dira:  Nous  faisons  ceci,  nous  ordonnons,  nous  avons  commande,  nous  voulons  que  cela  s'execute.  Or  celuy  qui  parle  ainsi,  n'entend  point  de  rien  deroguer  a  son  maistre.  Ainsi  en  font  les  serviteurs  de  Dieu:  car  ils  cognoissent  que  Dieu  les  a  ordonnez  comme  instrumens,  et  qu'il  les  employe  a  son  service,  tellement  qu'ils  ne  font  rien  de  leur  vertu  propre,  c'est  le  maistre  qui  les  conduit.  Voila  pourquoy  Moyse  dit:  Qu'il  a  donne  ce  partage,  voire,  ne  se  prenant  point  comme  un  homme  mortel:  mais  comme  celuy  que  Dieu  avoit  constitue  en  sa  place,  et  qui  faisoit  le  tout  au  nom  de  Dieu.  Voila  ce  que  nous  avons  a  retenir.  Et  c'est  une  doctrine  qui  nous  est  bien  utile:  car  elle  s'estend  plus  loin  que  ceci.  Et  qu'ainsi  soit,  si  nous  n'avions  ceste  reigle-la,  que  seroit-ce  de  tout  le  regime  de  l'Eglise?  Pourquoy  est-ce  que  nous  sommes  baptizez,  sinon  pour  obtenir  lavement  de  toutes  nos  macules,  et  que  nous  soyons  purs  et  nets  devant  Dieu:  que  nous  soyons  membres  de  Iesus  Christ,  revestus  de  sa  iustice:  bref,  que  nous  soyons  renouvellez  par  le  sainct  Esprit?  Maintenant  sera-il  en  l'homme  mortel,  qui  nous  baptise,  de  nous  donner  toutes  ces  choses?  Nenni,  si  nous  le  considerons  comme  homme  en  sa  personne  privee.  Mais  puis  que  Dieu  a  voulu  que  les  ministres  de  sa  parolle  baptisent  en  son  nom,  il  faut  que  le  Baptesme  ait  ceste  vertu  ici,  combien  qu'il  nous  soit  distribue  par  la  main  d'un  homme.  Et  puis  quant  a  la  Cene,  nous  voyons  que  nostre  Seigneur  Iesus  Christ  se  declare  la  estre  la  pasture  de  nos  ames.  Or  y  ha-il  creature  qui  nous  puisse  faire  participans  d'un  tel  bien?  Il  est  certain  que  non.  Or  est-il  ainsi  que  la  Cene  n'est  point  une  chose  frustratoire:  il  faut  donc  quand  nous  la  venons  recevoir,  que  nous  cognoissions  que  l'homme  n'est  point  separe  d'avec  Iesus  Christ.  Et  en  la  predication  de  la  parolle  de  Dieu  nous  voyons  le  semblable.  Il  est  dit,  que  les  ministres  sont  envoyez  pour  illuminer  les  aveugles,  pour  delivrer  les  captifs,  pour  pardonner  les  pechez,  pour  convertir  les  coeurs.  Comment?  voila  les  choses  qui  n'appartiennent  qu'a  Dieu  seul.  Et  de  faict,  quand  on  luy  voudroit  oster  la  moindre  portion  du  monde  de  ces  choses,  ce  seroit  aneantir  sa  Maieste  d'autant.  5