7:658  poenam  certe  horrerent,  quam  impiis  scripturae  sacrae  corruptoribus  cogimur  imprecari,  et  quam  procul  dubio  aliquando  Deus  expetet.  Ut  vicissim  oremus  alii  pro  aliis,  Iacobus  nos  monet,  quum  ante  praecepisset  de  mutua  confessione  (Iac.  5,  16).  Si  comprehendit  in  hoc  ordine  mortuos,  resurgant  oportet,  ac  confiteantur  nobis  peccata  sua:  alterum  enim  cum  altero  coniungit.  Ego  vero  Iacobi  verba  multo  aptius  in  eos  retorqueo:  quando  eos  solos,  qui  communiter  laborant,  iubet  inter  se  communicare  mutuas  preces  :  mortuos  esse  omittendos,  qui  iam  suis  laboribus  sunt  perfuncti.  Iacobus,  inquam,  non  alios  precibus  nostris  commendat,  quam  qui  versantur  adhuc  in  praesentis  vitae  certaminibus.  Contra  scriptura  beatos  pronunciat,  qui  sunt  in  Domino  mortui,  eo  quod  iam  requiescant  a  laboribus  suis.  Si  ita  est,  quid  illis  opitulari  queant  nostrae  preces?  Et  tamen  magnae  in  fratres  crudelitatis,  et  detestandae  in  Dominum  temeritatis  damnare  non  verentur  mediatores,  si  quis  ab  orationum  nostrarum  consortio  mortuos  excludat.  Imo  crudelitatis  Deum  accusent  potius,  qui,  quum  identidem  nos  tam  sollicite  ad  orandum  pro  fratribus  hortetur,  hanc  doctrinam  semper  ad  vivos  restringit.  Res  certe  adeo  levis  non  erat,  miseras  animas,  quae  ad  opem  flagitandam  mutae  sunt,  sublevare,  ut  praeteriri  debuerit.  Cur  ne  verbo  quidem  usquam  attingitur?  Praesertim  quum  toties,  tamque  diligenter,  tam  copiose,  tam  luculenter  concionentur  prophetae  omnes,  apostoli,  Christus  [pag.  179]  denique  ipse,  de  officiis  caritatis:  cur  hoc  supprimunt,  quod  inter  alia  postremum  non  erat?  Iam  quae  nostra  est  in  Dominum  temeritas?  Regulam  orandi  certam  tradit.  Eam  tenemus:  nec  fas  esse  putamus,  inde  vel  unguem  unum  deflectere.  At  Dominus,  inquiunt,  nequaquam  mortuos  a  vivis  separare  praecipit.  Imo  hoc  praecepti  vice  nobis  esse  debet,  quod  quum  ubique  vivos  nominatim  exprimat,  mortuos  segregat  ex  eorum  numero:  deinde,  quum  finitam  eorum  militiam  testatur,  non  amplius  habere  auxilio  nostro  opus  significat.  Nusquam  prohibet  Deus,  ne  pro  angelis  oremus.  An  eum  detestabitur,  qui  orandum  negabit?  Pro  apostolis  non  esse  orandum,  nec  pro  martyribus,  fatentur  ipsi  quoque  mediatores.  Atqui,  nusquam  legitur  prohibitum.  Cur  in  reliquis  mortuis  tam  erit  detestanda  nostra  temeritas?  Ipsi  vero  in  spiritum  sanctum  palam  sunt  contumeliosi,  quem  oblivionis  in  re  tam  necessaria  insimulant.  Atque  hinc  simul  apparet,  quanta  sit  eorum  moderatio,  qui  suas  detestationes  tam  futiliter  in  nos  evomunt.  Esto  tamen:  valeat  ecclesiae  veteris  consuetudo,  ut  sacerdos  in  coenae  celebratione  mortuos  Deo  commendet:  an  ideo  debent  vigiliae,  anniversaria  et  similes  nugae  retineri?  Sic  autem  placet  mediatoribus.  Obsecro,  si  qua  eos  cura  instaurandae  42