49:658  cidevant,  et  qu'encores  nous  deduirons  plus  a  plein:  mais  cela  ne  se  peut  pour  le  present  entamer.  Qu'il  nous  suffise  donc  pour  ceste  heure  de  retenir,  que  quand  nous  sommes  ainsi  redarguez  de  Dieu,  il  ne  faut  point  que  nous  concevions  une  fantasie  qu'il  nous  reiette,  et  qu'il  ne  veuille  plus  de  nous:  mai��  scachons  qu'il  nous  cherche,  et  que  nous  sommes  bienaimez  de  ceux  qui  parlent  comme  par  sa  bouche,  et  qui  sont  organes  de  son  sainct  Esprit.  Cognoissons  qu'il  se  declare  a  nous,  qu'il  nous  ouvre  son  coeur,  comme  s'il  nous  ouvroit  ses  entrailles,  pour  dire,  Ie  ne  vous  suis  point  ennemi,  encores  que  ie  vous  sois  rude:  et  c'est  un  bien  inestimable,  que  nous  cognoissions  que  quand  nostre  Seigneur  nous  traitte  rudement,  ce  n'est  pas  pour  ce  qu'il  nous  reiette:  mais  c'est  pour  ce  que  hayssant  nos  pechez,  il  les  veut  corriger:  et  ne  veut  point  que  nous  perissions  par  faute  d'estre  advertis.  Car  les  corrections  et  chastimens  qu'il  nous  envoye,  ce  sont  des  saignees  et  medecines  qu'il  nous  donne,  pour  nous  rendre  tesmoignage  que  tousiours  il  nous  est  Pere,  et  nous  tient  pour  ses  enfans,  et  qu'rl  est  pres  de  nous  le  monstrer  quand  nous  viendrons  a  luy  avec  une  vraye  repentance.  Or  nous  nous  prosternerons  devant  la  maieste  de  nostre  bon  Dieu  etc.  SEPTIEME  SERMON.  1.  COR.  Chap.  X  v.  15.18.  *  On  verra  communeement  que  celuy  qui  s'accorde  promptement  a  une  doctrine,  neantmoins  quand  ce  vient  a  la  pratiquer,  ne  scait  plus  que  c'est  et  a  perdu  memoire  s'il  ha  quelque  affection  mauvaise  qui  l'empesche  de  bien  iuger:  et  cela  est  par  trop  commun.  Et  de  faict,  quand  on  nous  propose  une  chose  en  general  :  pour  ce  qu'elle  ne  nous  attouche  point,  chacun  de  nous  en  respondra,  en  sorte  que  nous  verrons  bien  que  il  y  a  aux  hommes  assez  pour  les  tenir  convaincus,  et  pour  leur  oster  toute  escuse,  d'ignorance,  ie  di  aux  plus  petis  et  idiots.  Mais  tant  y  a  que  quand  nous  apercevons  quelque  interest  pour  nous  en  quelque  chose,  nous  voyla  esblouis,  nos  sens  sont  pervertis,  et  ce  que  nous  avions  sceu  auparavant,  nous  l'ignorons  :  aucuns  en  font  le  semblant,  les  autres  seront  la  tout  esblouis.  Et  voyla  pourquoy  sainct  Paul  en  ce  passage  dit,  qu'il  parle  aux  Corinthiens  comme  a  gens  entendus.  Puis  qu'ainsi  est,  il  semble  que  l'admonition  qu'il  a  faite  n'est  point  a  propos,  ou  qu'elle  est  superflue.  Ouy  bien  s'ils  pouvoyent  appliquer  ce  qu'ils  ont  cognu  a  tel  usage  comme  Dieu  le  commande:  mais  pour  ce  que  ils  s'en  destournent  et  s'esgarent,  voyla  pourquoy  sainct  Paul  les  rameine  au  vray  principe.  Notons  donc  que  ce  n'est  point  assez  d'avoir  ouy  la  doctrine  qu'on  nous  propose,  et  qu'on  nous  presche,  sinon  que  quand  ce  vient  a  la  pratiquer,  nous  en  scachions  faire  nostre  profit,  et  monstrions  que  ce  n'est  point  en  vain  que  nous  avons  este  enseignez.  Mais  afin  que  cela  soit  mieux  esclairci,  regardons  ce  que  sainct  Paul  traitte  en  ce  passage.  Les  Corinthiens  (comme  nous  avons  veu)  se  donnoyent  licence  d'aller  aux  banquets  des  idoles,  et  la  se  mesler  parmi  les  Payens.  Or  combien  qu'ils  ne  cuidassent  point  offenser,  si  est-ce  que  c'estoit  une  maniere  de  pollution,  et  ils  donnoyent  en  cela  mauvais  exemple  aux  infirmes,  ausquels  leur  sembloit  qu'ils  teinssent  encore  ie  ne  scay  quoy  de  la  superstition  des  incredules.  Maintenant  sainct  Paul  les  ramene  la,  que  quand  nous  usons  des  vrais  Sacremens  qui  nous  sont  instituez  de  Dieu,  nous  participons  a  luy.  Puis  qu'ainsi  est  donc,  quand