35:657  657  DE  LA  PROPHETIE  DE  CHRIST.  658  fonde  le  purgatoire,  car  d'autant  que  nous  ne  pouvons  pas  satisfaire  en  nostre  vie,  et  qu'il  y  demeure  tousiours  quelque  reliqua  ou  arrierage,  il  faut  disent-  ils,  que  nous  portions  la  peine  hors  de  ce  monde  et  qu'elle  soit  pour  payer  Dieu.  Voyla  des  mensonges  et  resveries  de  Satan,  dont  le  povre  monde  a  este  seduit.  Or  d'autant  plus  nous  faut-il  bien  observer  ceste  doctrine:  c'est  ascavoir  que  tout  ainsi  qu'en  la  Loy  Dieu  n'avoit  point  dit,  Vous  me  servirez  en  telle  sorte  et  en  telle  comme  bon  vous  semblera:  mais  avoit  mis  les  sacrifices,  et  ordonne  les  ceremonies  contenues  en  la  Loy,  et  la  il  se  faloit  arrester  sans  inventer  quelque  service  nouveau,  et  quelque  moyen  pour  acquerir  grace:  aussi  auiourd'huy  il  nous  faut  contenter  de  la  mort  et  passion  de  nostre  Seigneur  Iesus  Christ,  scachans  que  c'est  le  moyen  unique  par  lequel  Dieu  nous  sera  propice  et  favorable,  et  par  lequel  aussi  nous  serons  receus  et  adoptez  de  luy.  Voyla  notamment  ce  que  le  Prophete  a  voulu  exprimer.  Or  il  dit  qu'il  prolongera  ses  iours,  et  qu'il  verra  un  aage  permanent:  et  que  la  volonte  (ou  le  plaisir)  de  Dieu  prosperera  en  sa  main.  Il  nous  ramene  encores  a  ia  gloire  de  nostre  Seigneur  Iesus  Christ,  afin  que  nous  soyons  tant  plus  asseurez  que  nous  pouvons  venir  a  luy:  car  s'il  fust  demeure  en  la  mort  comme  vaincus,  nous  ne  pourrions  pas  estre  iustifiez  et  vivifiez  par  sa  grace.  Comment  la  mort  de  soy  apporteroit-eile  iustice,  si  elle  estoit  seule?  et  comment  aussi  apporteroit-elle  vie?  mais  d'autant  qu'avec  le  sacrifice  de  sa  mort,  ii  y  a  la  resurrection,  lors  nous  avons  plene  confiance.  Nous  voyons  comme  la  victoire  nous  est  acquise  sur  le  peche,  afin  que  nous  soyons  reputez  iustes:  et  la  mort  est  comme  abolie  en  nous,  afin  que  la  vie  y  domine,  II  est  vray  que  ceci  se  rapporte  en  premier  lieu  a  la  personne  du  Fils  de  Dieu,  comme  desia  nous  avons  declare  qu'il  est  mort  selon  l'infirmite  de  sa  chair,  mais  la  vertu  celeste  de  son  S.  Esprit  s'est  monstree  en  sa  resurrection,  comme  aussi  il  donne  ce  tesmoignage-la,  Destruisez  ce  temple,  et  ie  le  reedifieray  au  troisieme  iour.  Ainsi  voyla  comment  le  Fils  de  Dieu  quant  a  sa  personne  a  veu  grand  aage:  car  il  ne  s'est  pas  ressuscite  pour  se  monstrer  au  monde  quelque  peu  de  temps,  et  mourir  derechef:  mais  apres  s'estre  manifeste  a  ses  disciples,  apres  les  avoir  ordonnez  tesmoins  de  sa  resurrection,  ii  est  monte  au  ciel,  et  s'est  exempte  de  la  fragilite  de  la  condition  humaine.  C'est  donc  comme  nous  pouvons  fonder  nostre  fiance  en  luy,  voyans  qu'il  ha  toute  seigneurie  par  dessus  la  mort,  et  que  mesmes  il  a  vaincu  le  diable,  et  a  triomphe  sur  luy,  voire  tellement  qu'apres  s'estre  offert  en  sacrifice,  il  a  este  receu  et  exalte  en  ceste  puissance  et  empire,  dont  nous  avons  fait  mention  ci  dessus.  Calvini  opera.  Vol.  XXXV.