25:656  tenus  de  suyvre  ou  Dieu  nous  commande,  et  que  nous  surmontions  aussi  toutes  les  tentations  de  Sathan,  encore  qu'il  soit  assez  subtil  en  cest  endroit  de  nous  forger  et  bastir  des  occasions  tant  et  plus,  afin  de  nous  destourner  de  nostre  vocation.  Et  ainsi,  notons  ceste  admonition  qui  a  este  faite  aux  Iuifs  par  Moyse:  car  nous  sommes  aussi  bien  advertis  de  nostre  coste,  qu'il  est  impossible  que  nous  puissions  parvenir  la  ou  Dieu  nous  appelle,  si  nous  ne  surmontons  ces  craintes,  et  ces  espouvantemens,  c'est  a  dire,  si  nous  ne  bataillons  contre  toutes  difficultez  que  Sathan  nous  mettra  devant  les  yeux  pour  nous  effrayer.  Il  faut  donc  que  nous  soyons  munis  de  la  vertu  d'enhaut.  Voila  comme  il  nous  faut  appliquer  ce  passage  a  nostre  instruction.  Or  maintenant  les  choses  seront  encores  plus  claires,  et  mieux  entendues,  quand  nous  prendrons  la  similitude  entre  la  terre  qui  a  este  promise  aux  enfans  d'Israel,  et  le  royaume  de  Dieu  auquel  nous  sommes  conviez.  Car  de  faict,  la  terre  de  Chanaan  n'a  este  sinon  comme  une  figure  et  une  arre  du  royaume  celeste.  Si  les  peres  anciens  se  fussent  amusez  a  la  terre  qu'ils  voyoyent  devant  leurs  yeux,  ils  eussent  eu  un  povre  appuy  et  bien  debile.  Car  de  faict,  ils  n'en  ont  point  iouy  leur  vie  durant,  ils  n'ont  fait  que  passer  seulement  parmi  comme  estrangers  et  vagabonds.  Nous  voyons  comme  Abraham  n'en  a  point  eu  un  pied  de  possession,  sinon  qu'il  en  achetast  quelque  petite  portion  pour  la  sepulture  de  sa  femme,  mesmes  qu'il  n'y  a  point  eu  de  l'eau  a  boyre.  Iacob  en  a  este  banni  une  grande  partie  de  sa  vie.  Isaac  a  este  pourmene,  et  tous  les  Patriarches,  que  iamais  n'ont  possede  un  pied  de  ceste  terre  que  Dieu  leur  avoit  donnee  en  heritage,  et  a  leurs  successeurs.  Il  faut  donc  conclure  que  les  Peres  anciens  ont  passe  par  ceste  terre  visible,  et  l'ont  tellement  recogneue  pour  leur  heritage,  qu'ils  ont  tendu  au  ciel,  et  c'a  este  la  leur  vray  but.  Puis  qu'ainsi  est,  il  nous  faut  faire  ceste  similitude  entre  ceste  terre,  et  l'heritage  auquel  Dieu  nous  appelle,  comme  il  nous  a  este  acquis  par  nostre  Seigneur  Iesus  Christ.  Or  quand  il  est  dit,  que  Dieu  a  fait  passer  le  peuple  par  un  desert  horrible  et  hideux,  ceci  nous  appartient  si  nous  considerons  en  quel  estat  Dieu  nous  a  prins,  et  dont  il  nous  a  tirez.  Car  de  nature  ne  sommesnous  point  tous  damnez  et  perdus?  le  diable  n'a-il  pas  une  tyrannie  sur  nous,  de  laquelle  nul  ne  se  peut  delivrer  de  sa  vertu  propre?  Et  ainsi,  quand  nous  regarderons  ou  c'est  que  Dieu  nous  cerche  quand  il  nous  appelle  a  soy,  le  desert  par  lequel  les  Iuifs  ont  passe  n'est  point  si  hideux  ni  espouvantable,  comme  est  ceste  damnation,  en  laquelle  nous  sommes.  Car  nous  sommes  en  servitude  de  peche,  nous  sommes  sous  la  captivite  de  mort,  Sathan  domine  sur  nous,  et  est  roy  et  prince  de