35:654  le  peussent  ainsi  tormenter  a  leur  appetit:  car  ils  ne  pouvoyent  rien  sans  le  conseil  de  Dieu:  comme  aussi  sainct  Pierre  en  traitte  aux  Actes:  Dieu,  ditil,  a  execute  ce  que  sa  main  et  son  conseil  avoyent  determine.  Ainsi  donc,  non  sans  cause  le  Prophete  nous  ramene  tousiours  la,  qu'il  nous  faut  eslever  nos  sens  a  Dieu,  et  cognoistre  qu'estant  Iuge  du  monde,  il  a  voulu  prendre  satisfaction  de  nos  pechez  et  offenses  en  la  personne  de  son  Fils  unique,  afin  que  nous  en  fussions  acquittez:  et  que  non  sans  cause  Iesus  Christ  a  este  ainsi  batu  rudement,  a  ce  que  nous  puissions  cheminer  la  teste  levee:  et  que  nous  scachions  que  Dieu  ne  veut  point  avoir  souvenance  de  toutes  nos  turpitudes,  qui  nous  rendoyent  comme  detestables  devant  luy.  Et  quand  nous  aurons  cognu  cela,  nous  aurons  beaucoup  profite,  non  seulement  pour  un  iour,  mais  pour  tout  le  temps  de  nostre  vie.  Car  a  la  verite  c'est  une  doctrine  a  laquelle  il  nous  faut  tellement  vacquer,  qu'encores  qu'il  nous  semble  que  nous  l'ayons  bien  cognue,  nous  ne  laissions  pas  de  mettre  peine  de  nous  y  conformer  de  plus  en  plus.  Et  voyla  aussi  pourquoy  le  Prophete  adiouste  pour  plus  grande  expression,  qu'il  mettra  son  ame  pour  satisfaction  du  peche:  c'est  a  dire  que  Iesus  Christ  oubliera  sa  vie  pour  la  redemption  des  hommes  et  pour  le  pris  de  leurs  fautes  et  iniquitez.  Or  yci  derechef  le  Prophete  nous  propose  l'obeissance  volontaire  du  Fils  de  Dieu:  car  comme  il  a  dit  que  le  Pere  l'a  voulu  affliger,  aussi  maintenant  il  dit  que  de  son  coste  il  s'est  rendu  volontaire  a  cela,  et  qu'il  n'y  a  pas  este  force,  mais  est  venu  au  devant  pour  estre  un  vray  sacrifice.  Car  c'a  este  tousiours  la  coustume  que  les  sacrifices  fussent  presentez  a  Dieu  par  les  hommes,  voire  d'une  franche  volonte  et  devotion,  comme  on  dit:  II  a  donc  falu  de  mesmes  que  nostre  Seigneur  Iesus  se  soit  offert  et  abandonne  a  la  mort  qu'il  a  enduree.  Et  (comme  il  fust  hier  declare)  sans  cela  nos  rebellions  ne  seroyent  pas  reparees  devant  Dieu:  mais  quand  il  a  mis  son  ame,  c'est  a  dire  qu'il  s'est  rendu  prest  et  appareille  a  souffrir  la  condamnation  qui  nous  estoit  deue,  voyla  comme  en  sa  mort  nous  pouvons  avoir  plene  confiance  de  salut.  Et  luy  mesme  l'a  ainsi  prononce  en  sainct  Iehan,  Nul  ne  m'ostera  ma  vie,  dit-il,  mais  ie  la  quitteray  de  mon  gre.  Il  est  vray  que  sa  vie  luy  a  este  ostee  quand  il  a  este  crucifie:  et  nous  voyons  de  quelle  inhumanite  et  rage  ont  este  poussez  ceux  qui  le  crucifioyent:  mais  tant  v  a  qu'ils  ne  pouvoyent  rien  attenter  contre  luy,  encores  qu'ils  l'eussent  voulu,  et  qu'ils  s'y  fussent  efforcez,  sinon  d'autant  que  tout  cela  a  este  fait  selon  l'ordonnance  et  le  decret  de  Dieu  le  Pere,  comme  desia  nous  avons  declare,  allegant  ce  passage  des  Actes,  Ils  n'ont  fait  sinon  ce  que  ta  main  et  ton  conseil  avoyent  establi.  Mais  outre