48:652  de  Dieu  sera  sauve.  Car  de  la  il  s'ensuit  au  contraire  que  qui  ne  l'invoquera  sera  damne.  Et  pour  autant  que  nous  sommes  si  froids  et  tant  aisez  a  nous  destourner  de  l'invocation  du  nom  de  Dieu,  le  Prophete  a  voulu  signifier  qu'il  ne  faut  point  que  nous  desistions  d'invoquer  Dieu,  au  milieu  de  tous  les  troubles  qui  nous  pourroyent  advenir:  voire  quand  le  ciel  et  la  terre  auroyent  conspire  contre  nous,  c'est  alors  qu'il  nous  faut  addresser  vers  Dieu  tant  de  coeur  que  de  bouche,  et  de  toutes  nos  forces.  Mais  ce  n'est  point  le  tout  que  nous  ayons  la  bouche  ouverte  pour  dire  un  Pater  noster,  ou  bien  le  dire  en  langage  cognu,  Nostre  Pere  qui  es  es  cieux:  sinon  qu'il  y  ait  une  vraye  affection  de  coeur  fondee  en  la  foy.  Autrement  nous  pourrions  repeter  ceste  priere  dix,  vingt,  trente  fois,  et  ce  ne  seront  que  parolles  iettees  en  l'air.  Ie  laisse  encores  ceux  qui  y  meslent  leur  Ave  Maria,  pensans  par  tels  menus  fatras  invoquer  vrayement  Dieu  comme  il  le  demande.  Mais  telle  maniere  de  gens  sont  bien  loin  de  la  vraye  invocation  de  Dieu:  ce  sont  hereges  et  sorciers  qui  ne  peuvent  oublier  leurs  vieilles  superstitions  diaboliques.  Or  il  ne  se  faut  pas  trop  esbahir  de  telles  reliques  de  Satan:  car  ils  n'eurent  iamais,  et  n'ont  encores  de  present  aucune  foy  en  Iesus  Christ.  Et  par  ainsi  (comme  dit  S.  Paul)  comment  invoqueront-ils  celuy  auquel  ils  n'ont  point  creu?  Et  c'est  un  passage  qu'il  faut  bien  noter:  car  S.  Paul  nous  declare  que,  quand  il  nous  est  parle  d'invoquer  le  nom  de  Dieu,  il  faut  que  nous  le  cherchions  comme  nostre  Pere:  scachans  que  nous  avons  en  luy  tout  bien  et  qu'il  est  prest  de  nous  recevoir  si  tost  que  nous  retournerons  a  luy.  Autrement  quel  courage  aurions-nous  de  le  requerir  si  nous  n'avions  cela?  Il  faut  donc  que  nous  soyons  tout  asseurez,  que  quand  nous  invoquons  le  Seigneur  Dieu  en  verite  il  nous  recoit.  Et  par  cela  on  voit  quelle  est  la  fantasie  de  la  foy  des  Papistes.  Ils  disent  qu'il  ne  faut  nullement  presumer  d'estre  exaucez  de  Dieu  quand  on  l'invoque,  pource  qu'on  ne  scait  si  on  est  en  estat  de  grace  ou  non,  et  que  ce  seroit  une  trop  grande  presomption  de  penser  cela.  Que  faut-il  donc  faire?  Ils  disent  qu'il  faut  prier  en  doutant,  et  que  moyennant  qu'on  se  remette  du  tout  a  leur  saincte  Eglise  c'est  assez:  ascavoir  qu'on  ait  tousiours  ceste  response  preste:  Ie  croy  ce  que  saincte  mere  Eglise  croit.  Voyla  comme  ils  auront  tousiours  une  foy  douteuse  et  enveloppee,  et  S.  Paul  declare  que  Dieu  la  desavoue.  Car  il  faut  que  l'Evangile  nous  soit  presche,  non  pas  pour  nous  mettre  en  doute,  mais  pour  nous  asseurer  de  nostre  salut.  Il  est  donc  bien  facile  a  iuger  quelle  est  la  foy  des  Papistes,  en  laquelle  nous  avons  este  du  temps  de  nostre  ignorance.  Et  faut  que  nous  cognoissions  que  Dieu  nous  a  fait  une  grace  singuliere  quand