35:652  Dieu  nous  les  veut  ramener  en  memoire  et  en  conte,  voyant  que  nous  les  voulons  ainsi  cacher  par  subterfuges.  Mais  cependant,  notons  que  nous  pouvons  maintenant  venir  nous  presenter  devant  Dieu  et  ses  Anges,  estans  asseurez  que  nos  fautes  ne  viendront  point  en  avant,  et  que  nos  turpitudes  ne  seront  point  descouvertes,  d'autant  que  nostre  Seigneur  Iesus  a  este  ainsi  blasme:  et  ce  n'est  point  cas  d'aventure,  ne  que  les  hommes  ayent  rien  usurpe  sur  luy  sans  la  volonte  de  Dieu:  mais  c'est  d'autant  que  Dieu  l'avoit  ainsi  establi,  et  c'a  este  un  iugement  celeste.  Or  puis  que  nostre  Seigneur  Iesus  est  iuste,  il  faut  bien  qu'il  porte  nos  charges  sur  luy,  quand  il  est  ainsi  afflige.  Et  ainsi  cognoissons  en  premier  lieu  que  nous  sommes  dignes  de  tout  opprobre:  et  puis  neantmoins  que  nous  en  sommes  absous,  d'autant  qu'il  nous  en  a  acquittez,  et  que  la  satisfaction  en  a  este  faite  en  sa  personne.  Voyla  donc  pourquoy  et  a  quel  propos  il  est  yci  parle  de  l'innocence  et  de  l'integrite  du  Fils  de  Dieu.  Ce  n'est  point  pour  amener  quelque  excuse  quant  a  luy,  mais  c'est  afin  de  nous  faire  sentir  quels  nous  sommes,  et  la  ou  il  falloit  que  nous  veinssions  sinon  que  nous  en  eussions  este  retirez  et  rachetez.  Au  reste,  le  Prophete  voulant  exprimer  une  perfection  plene,  et  a  laquelle  il  n'y  a  que  redire,  dit  qu'il  ne  s'est  point  trouve  de  fraude  en  sa  bouche.  Or  comme  dit  S.  Iaques,  il  faut  bien  qu'un  homme  soit  parfait,  quand  mesme  il  ne  luy  eschappera  point  une  parolle  vicieuse,  pource  que  la  langue  est  si  fragile  que  rien  plus.  Et  combien  que  nous  soyons  par  trop  enclins  a  tout  mal,  si  est-ce  que  celuy  qui  pourra  retenir  ses  mains  et  ses  pieds,  et  qui  pourra  se  regler  en  toute  sa  vie,  tellement  qu'on  n'y  voye  que  crainte  de  Dieu  et  toute  vertu,  encores  ne  pourra  il  pas  tenir  si  bien  sa  langue,  qu'on  y  appercoyve  queque  legerete,  et  quelque  inconsideration,  mensonge  ou  feintise.  Brief  il  est  dit  qu'en  nostre  Seigneur  Iesus  Christ  il  ne  s'est  trouve  aucune  fraude,  pour  monstrer  qu'en  tous  ses  faits  et  en  tous  ses  dits  il  a  este  un  miroir  de  sainctete.  Or  il  est  certain  que  toutes  les  miseres  que  nous  endurons  sont  les  fruits  de  nos  pechez.  Car  si  nous  fussions  demeurez  en  l'integrite  en  laquelle  Dieu  avoit  mis  nostre  Pere  Adam,  tous  blasmes  cesseroyent  au  monde  et  seroyent  abolis:  c'est  donc  le  fruit  de  nos  pechez,  quand  nous  sommes  blasmez.  Ainsi  il  faut  conclure,  d'autant  qu'il  ne  s'est  trouve  aucune  tache,  non  pas  la  moindre  du  monde  en  nostre  Seigneur  Iesus  Christ,  qu'il  a  porte  la  punition  que  nous  avions  meritee  et  deservie.  Et  voyla  aussi  pourquoy  le  Prophete  adiouste,  que  Dieu  Va  voulu  affliger  d'infirmite.  Ce  mot  d'infirmite  s'estend  bien  loin  en  l'Escriture:  car  il  emporte  toutes  les  choses  qui  rendent  les  hommes