23:652  comme  singulier,  de  Melchisedec.  Cependant  si  voyons-nous  que  Dieu  a  discerne  l'un  d'avec  l'autre  en  sa  Loy  et  n'a  point  voulu  qu'une  seule  personne  eust  les  deux.  Moyse  a  este  aussi  excellent  en  toute  perfection  de  vertus  que  iamais  il  y  eut  homme  ne  au  monde:  et  neantmoins  si  est-ce  que  Dieu  ne  l'a  point  voulu  avoir  pour  Sacrificateur  [pag.  35],  mais  son  frere  Aaron,  d'autant  que  Moyse  estoit  assez  empesche  au  gouvernement  qu'il  soustenoit.  Et  defait  nous  voyons  comme  Osias  a  este  puni:  car  estant  Roy  il  est  meu  de  ceste  fole  arrogance,  qu'il  veut  aussi  usurper  la  sacrificature  :  et  seulement  pour  avoir  fait  le  perfum  a  l'autel,  il  est  frappe  de  lepre,  mis  en  ignominie,  et  reclus  pour  toute  sa  vie.  Et  si  semble  il  qu'il  y  ait  quelque  devotion  bonne,  ou  pour  le  moins  qu'il  fut  a  excuser.  Voire  mais  Dieu  ne  punit  point  seulement  ce  qui  apparoit:  car  il  a  cognu  l'orgueil  du  Roy  Osias.  Et  puis  il  est  dit  qu'obeissance  vaut  mieux  que  tous  sacrifices.  Et  d'autant  qu'il  s'est  ingere  constre  la  deffense  de  Dieu,  et  qu'il  a  trouble  la  vocation  et  l'ordre  qui  devoit  estre  inviolable:  voila  pourquoy  il  est  puni:  et  selon  qu'il  ne  s'est  point  contente  de  son  degre,  il  faut  qu'il  soit  rendu  comme  infame  et  detestable,  et  separe  de  la  compaignie  des  hommes.  Ainsi  nous  voyons  qu'en  la  Loy  c'ont  este  deux  choses  incompatibles,  que  le  royaume  et  la  sacrificature.  Puis  qu'ainsi  est  donc,  il  faut  conclure  qu'il  y  a  icy  un  exemple  singulier,  et  qui  n'appartient  point  a  la  Loy.  Il  est  vray  qu'en  ce  temps-la  la  Loy  n'estoit  point  encores  escrite,  et  la  lignee  de  Levi  n'estoit  pas  encores  au  monde,  pour  avois  le  droit  de  la  dignite  sacerdotale:  mais  tant  y  a  que  cest  exemple  ici  nous  est  demonstre  [pag.  36]  pour  instruction,  afin  que  la  Loy  demeure  en  sa  vigueur,  et  que  l'Eglise  en  soit  edifiee,  comme  il  appert  par  le  Pseaume  que  nous  avons  allegue.  Il  faut  donc  conclure  qu'il  n'est  point  parle  ne  de  Salomon,  ne  de  quelque  autre  Roy  descendu  de  la  race  de  David:  car  s'ils  estoyent  Roys,  il  falloit  qu'ils  s'abstinssent  de  la  sacrificature,  ou  autrement  ils  estoyent  apostats.  Pourtant  quand  il  est  dit  que  y  aura  un  Roy  a  la  figure  de  Melchisedec,  et  selon  son  ordre  et  son  estat:  cela  monstre  qu'il  n'estoit  point  parle  de  toute  la  race  de  David,  qui  est  descendue  de  luy  selon  la  chair,  sinon  iusques  a  ce  que  nous  venions  au  souverain  Sacrificateur  qui  est  nostre  Seigneur  Iesus  Christ.  Il  est  bien  vray  qu'il  est  fils  de  David  et  de  sa  semence:  mais  il  y  a  en  luy  un  regard  special,  voire  unique:  c'est  qu'il  met  fin  a  la  sacrificature  legale,  d'autant  qu'il  a  son  royaume  spirituel:  c'est  aussi  pour  mettre  fin  a  cest  Empire  terrien,  qui  avoit  este  establi  pour  un  temps,  et  iusques  a  sa  venue.  Or  quand  il  est  nomme  Perpetuel:  c'est  qu'il  a  continue  en  la  personne  du  Redempteur.  C'est  donc  ce  que  nous