50:65  65  CAPUT  V.  afflictionibus,  ut  etiam  moriendo  sint  mortis  victores,  idque  propterea  quod  per  afflictiones  et  mortem  ad  beatam  vitam  perveniant:  ex  eodem  fonte  alteram  quoque  sententiam  deducit:  nempe  in  hoc  illis  incumbendum  esse  praecipuo  studio  ut  Deo  placeant..  Et  sane  fieri  aliter  nequit  quin  spes  resurrectionis  et  iudicii  cogitatio  hoc  studium  in  nobis  excitet.  Sicuti  e  converso  non  alia  de  causa  adeo  socordes  sumus  et  desides  in  officio,  nisi  quod  nunquam  aut  raro  nobis  in  mentem  venit  quod  obversari  memoriae  nostrae  perpetuo  debuerat,  nos  hic  inquilinos  esse  ad  breve  tempus,  ut  peracto  cursu  redeamus  ad  Christum.  Nota  autem  quod  dicit,  tam  mortuis  quam  vivis  hoc  inesse  studium:  quo  iterum  confirmatur  animarum  immortalitas.  10.  Manifestari.  Quamquam  omnibus  hoc  commune  est,  non  tamen  omnes  promiscue  huc  usque  attollunt  mentem,  ut  singulis  momentis  Christi  tribunal  sibi  obeundum  cogitent.  Sed  quum  Paulus  sancto  recte  agendi  studio  se  coram  Christo  assidue  sisteret,  oblique  perstringere  voluit  ambitiosos  doctores,  quibus  satis  erat  plausum  humani  theatri  ferre.  Nam  ubi  dicit  neminem  posse  effugere,  quodammodo  eos  citare  videtur  ad  coeleste  illud  tribunal.  Porro  manifestandi  verbum  etsi  posset  exponi  apparere,  tamen  altius  spectavit  Paulus,  meo  iudicio:  tunc  nos  in  lucem  prodituros,  quum  nunc  quasi  in  tenebris  delitescant  multi.  Libri  enim  tunc  aperientur,  qui  nunc  clausi  sunt.  Ut  reportet  unusquisque.  Quia  hic  locus  est  de  remuneratione  operum,  breviter  notandum  est:  sicuti  puniuntur  a  Deo  mala  opera,  ita  etiam  mercedem  bonis  rependi,  sed  diversa  ratione:  retribuitur  enim  malis  operibus  poena,  quam  merentur:  sed  Deus  in  remunerandis  bonis  operibus  non  respicit  meritum  aut  dignitatem.  Nullum  enim  opus  adeo  plenum  est  ac  numeris  suis  absolutum,  ut  illi  merito  placeat.  Deinde  non  aliter  per  se  placent  cuiusquam  opera  Deo,  nisi  universae  legi  satisfaciat:  nemo  autem  tam  perfectus  reperitur.  Itaque  unicum  refugium  est,  ut  gratuita  bonitate  nos  acceptos  habeat  ac  nos  iustificet,  non  imputando  nobis  peccata.  Posteaquam  nos  in  gratiam  recepit,  gratuita  etiam  acceptione  opera  nostra  amplectitur:  hinc  merces  dependet.  Nihil  igitur  absurdi  si  bona  opera  praemio  dignetur:  modo  intelligamus  id  nihil  obstare  quominus  gratis  consequantur  homines  vitam  aeternam.  De  hac  re  plura  dixi  in  superiorem  epistolam,  et  Institutio  nostra  plenam  tractationem  suppeditabit.  Quum  dicit  per  corpus,  non  tantum  externas  actiones  intelligo,  sed  omnia  opera,  quae  in  vita  corporali  perpetrantur.  11.  Scientes  igitur.  Nunc  ad  se  redit,  vel  iterum  doctrinam  universalem  sibi  privatim  accommodat.  Ego,  inquit,  non  ignarus  sum  aut  expers  timoris  Dei,  qui  debet  regnare  in  cordibus  omnium  piorum.  Calvini  opera.  Vol.  L.