47:65  65  CAPUT  III.  eoim  non  facile  sibi  homines  persuadent  a  Deo  se  diligi,  nt  omnem  dubitationem  eximeret,  nominatim  expressit  tantopere  nos  Deo  fuisse  caros,  ut  ne  unigenito  quidem  filio  pepercerit  nostra  causa.  Quum  ergo  satis  superque  testatam  nobis  suam  caritatem  fecerit  Deus,  quisquis  hoc  testimonio  non  contentus  adhuc  vacillat,  non  levem  Christo  iniuriam  facit,  quasi  unus  aliquis  ex  vulgo  temere  in  mortem  proiectus  fuerit.  Quin  potius  ita  reputandum  est,  quanti  unigenitum  suum  filium  Deus  aestimat,  tam  pretiosam  illi  fuisse  nostram  salutem,  cuius  pretium  unigeniti  ipsius  mortem  esse  voluit.  Caeterum  hoc  nomen  iure  Christus  obtinet  quia  unicus  est  natura  filius.  Nobiscum  vero  hunc  honorem  adoptione  tunc  demum  communicat,  quum  inserimur  in  eius  corpus.  Qui  credit  in  eum,  non  pereat.  Insigne  fidei  elogium,  quod  nos  ab  aeterno  interitu  vindicat.  Diserte  enim  exprimere  voluit,  quamvis  ad  mortem  videamur  nati,  certam  tamen  offerri  liberationem  in  Christi  fide,  ita  mortem  quae  alioqui  nobis  imminet  minime  timendam  esse.  Et  universalem  notam  apposuit,  tum  ut  promiscue  omnes  ad  vitae  participationem  invitet,  tum  ut  praecidat  excusationem  incredulis.  Eodem  etiam  pertinet  nomen  mundi  quo  prius  usus  est.  Tametsi  enim  in  mundo  nihil  reperietur  Dei  favore  dignum,  se  tamen  toti  mundo  propitium  ostendit,  quum  sine  exceptione  omnes  ad  fidem  Christi  vocat,  quae  nihil  aliud  est  quam  ingressus  in  vitam.  Caeterum  meminerimus,  ita  communiter  promitti  omnibus  vitam  in  Christo  qui  crediderint,  ut  tamen  minime  communis  omnium  sit  fides.  Patet  enim  omnibus  Christus  ac  expositus  est,  solis  tamen  electis  oculos  Deus  aperit,  ut  fide  ipsum  quaerant.  Porro  hinc  constat  admirabilis  fidei  effectus,  quia  per  eam  Christum  recipimus  qualis  nobis  datus  est  a  patre,  nempe  qui  nos  aeternae  mortis  reatu  solutos  vitae  aeternae  haeredes  efficiat,  quia  mortis  suae  sacrificio  peccata  nostra  expiavit,  ne  quid  obstet  quominus  nos  pro  filiis  suis  agnoscat  Deus.  Quando  igitur  Christum  cum  mortis  suae  efficacia  et  resurrectionis  fructu  amplectitur  fides,  non  mirum  est  si  per  eam  Christi  quoque  vita  potimur.  Nondum  tamen  satis  liquet,  cur  et  quomodo  vitam  nobis  conferat  fides:  an  quia  spiritu  nos  suo  regenerat  Christus,  ut  vivat  in  nobis  ac  vigeat  Dei  iustitia,  an  vero  quia  sanguine  '  eius  purgati  a  peccatis  gratuita  venia  iusti  apud  Deum  censemur.  Certum  quidem  est  haec  duo  semper  coniuncta  esse,  sed  quia  hic  de  salutis  certitudine  agitur,  tenenda  praecipue  est  haec  ratio,  nos  ideo  vivere,  quia  Deus  peccata  non  imputando  gratis  nos  amat.  Ideo  nominatim  sacrificii  fit  mentio,  quo  simul  cum  peccatis  maledictio  et  mors  abolita  est.  Iam  prius  admonui  quorsum  spectent  haec  duo  membra,  nempe  ut  sciamus  vitam  nos  recuperare  Calvini  opera.  Vol  XLVII.