48:649  649  DE  LA  PENTECOSTE.  650  fontaine  de  Ierusalem,  qui  a  espandu  ses  rivieres  par  tout  le  monde,  tellement  qu'un  chacun  n'en  pourra  pas  seulement  recevoir  pour  soy-mesme,  mais  nous  en  distribuerons  a  nos  prochains.  Il  est  vray  que  tous  ne  sont  pas  docteurs  pour  enseigner:  mais  tant  y  a  que  si  nous  sommes  Chrestiens  nous  avons  assez  de  quoy  exhorter  nos  prochains.  Or  maintenant  venons  a  l'autre  partie  de  la  prophetie  de  Ioel,  ou  il  est  dit  que  Dieu  envoyera  des  signes  terribles  et  merveilleux,  sang  et  feu  et  vapeurs  de  fumee.  En  quoy  le  Prophete  a  voulu  signifier  que,  quand  Dieu  visiteroit  son  peuple  a  la  venue  de  Iesus  Christ,  combien  qu'une  grande  felicite  et  benediction  fust  promise,  ce  ne  seroit  pas  a  dire  pourtant  que  nous  ne  veissions  des  choses  horribles  et  merveilleuses.  Et  il  estoit  bien  besoin  que  nous  eussions  cest  advertissement,  afin  que  nous  cognoissions  que  la  venue  de  Iesus  Christ  n'a  pas  este  pour  nous  mettre  en  ce  monde  comme  en  un  paradis,  et  pour  y  vivre  a  nostre  aise:  mais  que  Iesus  Christ  estoit  envoye  a  une  autre  fin  :  ascavoir  pour  nous  retirer  de  ces  choses  basses  et  nous  eslever  iusques  au  ciel.  Et  de  faict  nous  voyons  qu'il  n'y  eut  iamais  de  choses  si  horribles  et  merveilleuses  comme  a  la  venue  de  Iesus  Christ.  Que  si  on  demande  pourquoy  telles  choses  sont  advenues  encores  apres  que  Iesus  Christ  a  este  revele,  c'est  pource  que  nous  sommes  si  malheureux  que  nous  ne  voulons  recevoir  les  graces  qu'il  nous  veut  faire.  Or  quand  nostre  Seigneur  se  presente  a  nous  et  nous  le  reiettons,  ne  faut-il  point  alors  qu'il  leve  sa  main,  qu'il  foudroye  et  tempeste  en  telle  sorte  que  nous  soyons  esmeus  et  troublez  pour  une  telle  ingratitude?  Voyla  donc  pourquoy  il  est  dit  que,  quand  Dieu  aura  espandu  son  sainct  Esprit,  il  faudra  que  nous  voyons  de  merveilleux  troubles,  et  que,  quand  nous  aurons  regarde  la  haut  au  ciel,  et  ca  bas  en  la  terre,  nous  y  verrons  de  si  grans  troubles  et  estonnemens,  qu'il  semblera  que  le  ciel  doyve  abysmer  et  la  terre  se  mesler  ensemble:  le  soleil  sera  obscurci,  la  lune  se  convertira  en  sang,  les  estoilles  tomberont  du  ciel,  et  autres  signes  merveilleux  apparoistront.  Il  est  vray  qu'aucuns  restreignent  ceci  au  dernier  iour:  mais  le  Prophete  a  voulu  parler  de  tout  le  regne  de  Iesus  Christ,  iusques  a  ce  qu'il  viene  au  dernier  iour  pour  iuger.  Il  faut  donc  que  nous  appliquions  a  nostre  temps  tous  les  signes  qui  sont  yci  declarez.  Car  si  nous  considerons  les  choses  qui  sont  advenues  depuis  que  l'Evangile  est  presche,  nous  n'y  pouvons  penser  que  les  cheveux  ne  nous  dressent  en  la  teste.  Il  est  vray  que  si  nous  avions  veu  ce  qui  s'est  fait  a  la  venue  de  Iesus  Christ,  nous  serions  bien  eslourdis  si  nous  n'en  estions  espovantez  :  mais  encore  si  nous  pensons  bien  a  ce  qui  se  fait  tous  les  iours,  nous  aurons  matiere  de  nous  esmerveiller  d'avantage.