49:648  en  quoy  nous  luy  rendons  le  principal  sacrifice  qu'il  demande,  c'est  a  scavoir  en  nous  aneantissant  du  tout,  afin  de  cercher  en  luy  tout  secours  selon  le  besoin  et  la  necessite.  Voyla  quant  a  ceste  presomption  charnelle.  Mais  il  y  a  bonne  seurte  que  Dieu  approuve  :  c'est  quand  nous  sommes  appuyez  sur  ses  promesses,  pour  non  seulement  nous  reposer  la,  mais  aussi  l'invoquer.  Car  celuy  qui  est  fonde  en  soy,  c'est  a  dire  qui  cuide  avoir  assez  de  vertu,  celuy  la  se  iettera  a  l'abandon  a  tous  corps,  comme  nous  avons  dit;  et  il  se  trouvera  frustre  de  son  attente.  Mais  celuy  qui  ne  se  reposera  qu'en  Dieu  seul,  et  en  ses  promesses,  pensera  a  son  infirmite.  Pourquoy  est-ce  que  nous  attendons  secours  de  Dieu,  et  que  nous  mettons  en  luy  nostre  vertu?  D'autant  que  nous  coignoissons  que  nous  ne  pouvons,  et  ne  sommes  rien:  que  le  diable  ne  fera  que  souffler,  et  il  nous  aura  incontinent  fait  esvanouir,  que  nous  n'aurons  nul  courage.  Quand  donc  les  hommes  seront  ainsi  humiliez,  ils  seront  disposez  a  se  fier  en  Dieu,  et  a  se  mettre  en  sa  garde:  mais  cependant  qu'il  y  aura  une  seule  goutte  de  presomption  en  nous,  il  est  certain  que  nous  n'irons  point  cercher  Dieu,  mais  plustost  mespriserons  toute  sa  grace.  Or  quand  nous  sommes  ainsi  advertis  de  nostre  infirmite,  quant  et  quant  nous  invoquons  Dieu  qu'il  ait  pitie  de  nous.  Et  de  faict  les  promesses  qu'il  nous  donne,  nous  doyvent  servir  d'autant  de  coups  d'esperon.  Celuy  qui  est  le  mieux  fonde  aux  promesses  de  Dieu,  se  fera  le  plus  abaisse:  et  cependant  ce  sera  aussi  le  plus  asseure,  et  le  plus  hardi  de  tous.  Voire,  non  pas  en  soy,  mais  en  se  confiant  que  Dieu  ne  luy  defaudra  point.  Et  sur  cela  il  sera  tant  plus  enflamme  a  prier  Dieu.  Car  toutesfois  et  quantes  il  pensera  a  ceste  aide  que  Dieu  promet,  il  sera  aussi  adverti  de  sa  necessite,  pour  recourir  au  remede.  Ainsi  donc  notons  bien  que  toute  la  seurte  que  nous  avons  par  la  foy,  et  ce  que  nous  tenons  des  promesses  de  Dieu,  n'est  point  pour  nous  mettre  en  nonchalance,  et  pour  nous  faire  endormir,  mais  plustost  pour  nous  faire  recourir  a  Dieu  et  avoir  nostre  refuge  a  la  grace  de  son  sainct  Esprit,  par  laquelle  nous  soyons  fortifiez.  Et  quand  nous  prions  ainsi  Dieu,  ce  ne  est  point  par  feintise:  mais  c'est  pour  ce  que  nous  voyons  bien  que  sans  luy  nous  defaillons.  Ce  sont  donc  de  choses  qui  s'accordent  tres  bien,  que  la  foy  est  la  sollicitude.  Ie  di  la  sollicitude  qui  n'empesche  point  que  nous  ne  bataillons.  Car  il  y  a  ceste  angoisse  qu'ont  les  incredules,  quand  ils  tremblent,  doutans  si  Dieu  leur  sera  propice,  ou  non  :  et  ne  scavent  s'il  se  veut  monstrer  de  leur  coste.  Quand  donc  les  incredules  doutent  ainsi,  et  sont  ea