49:644  pas  d'estre  enfans  de  Dieu,  d'estre  adoptez  au  salut  eternel  qu'auiourd'huy  nous  esperons  :  mais  tant  y  a  qu'ils  avoyent  des  ombrages  et  des  figures,  d'autant  qu'ils  n'estoyent  pas  venus  encores  en  tel  degre,  ne  si  haut  comme  nous,  qui  avons  les  choses  revelees  en  l'Evangile  mieux  qu'ils  n'ont  pas  eu  sous  les  figures  de  la  Loy.  Sainct  Paul  donc  regarde  a  telle  diversite,  et  dit  que  les  fins  des  aages  sont  venues  a  nous:  c'est  a  dire  qu'auiourd'huy  nous  sommes  comme  si  nous  estions  parvenu  a  l'aage  de  vingt  cinq  ans.  Comme  on  dira  a  celuy  qui  est  desia  devenu  homme,  Or  tu  n'es  plus  enfant,  regarde  a  toy.  Car  en  l'aage  de  huit  ou  dix  ans,  il  faloit  que  la  verge  fust  tousiours  sur  ton  dos:  mais  maintenant  que  tu  es  devenu  homme,  il  ne  faut  plus  que  tu  te  faces  picquer,  tu  dois  avoir  discretion.  Faut-il  qu'on  te  remonstre,  et  qu'on  te  face  honte  a  chacun  coup?  Et  tu  devois  avoir  discretion  et  prudence  pour  te  gouverner.  Voyla  comme  on  parlera  a  chacun  de  nous.  Or  sainct  Paul  parle  ainsi  a,  tout  le  corps  de  l'Eglise,  d'autant  que  nostre  Seigneur  Iesu  Christ  nous  a  apporte  perfection  de  doctrine:  et  dit  que  les  fins  des  aages  sont  venus  a  nous  :  c'est  donc  bien  raison  que  nous  soyons  mieux  enseignez  que  ceux  qui  ont  vescu  sous  la  Loy.  Ainsi  notons  bien  que  quand  sainct  Paul  parle  de  la  fin  des  aages,  c'est  se  conformant  a  ce  qui  est  dit  en  toute  l'Escriture  ;  que  auiourd'huy  Dieu  parle  a  nous  comme  a  plene  bouche,  et  c'est  la  comparaison  que  fait  l'Apostre  en  l'Epistre  aux  Hebrieux  disant  que  Dieu  a  parle  anciennement  a  nos  Peres  en  plusieurs  sortes:  mais  en  ces  derniers  temps  il  a  parle  a  nous  par  son  Fils  unique.  Et  voyla  pourquoy  l'Escriture  aussi  dit  que  nous  sommes  aux  derniers  iours  et  aux  derniers  temps.  Et  comment?  Les  Apostres  ont  use  de  ce  mot  apres  la  resurrection  de  nostre  Seigneur  Iesus  Christ.  Or  il  se  sont  escoulez  maintenant  plus  de  quinze  cens  ans  pour  le  moins.  Et  comment  donc  disent-ils  qu'ils  estoyent  es  derniers  temps  desia  alors?  comme  si  nous  ne  differions  rien  d'avec  eux  quant  au  temps.  Nenni:  car  alors  Dieu  a  voulu  declarer  qu'il  ne  faut  plus  esperer  aucun  changement:  et  que  les  choses  estans  accomplies  en  la  personne  de  nostre  Seigneur  Iesus  Christ,  il  y  avoit  une  perfection  en  l'Evangile.  Ie  ne  di  point  perfection  quant  aux  hommes  (elle  n'y  peut  estre)  mais  quant  a  la  doctrine.  Or  donc  maintenant  notons  qu'il  y  a  moins  d'excuse  pour  nous,  que  pour  les  Peres  anciens,  quand  nous  ferons  nostre  profit  des  exemples  que  nostre  Seigneur  nous  propose.  Il  est  dit,  Ne  soyez  point  rebelles  comme  vos  Peres.  Voyla  les  Prophetes  qui  ont  ainsi  parle  au  peuple  qui  a  vescu  sous  la  Loy.  Regardez  comme  vos  Peres  ont  vescu  au  desert,  et  comme  ils  ont  este  traitte  par  l'espace  de  quarante  ans,  a  cause  de  leurs  rebellions  et  de  leur  malice.  Il  a  donc  falu