48:644  les  merveilles  qui  se  feront  a  la  venue  de  Iesus  Christ,  depuis  le  temps  qu'il  est  venu  iusques  au  dernier  iour.  Et  de  faict,  tant  plus  nous  irons  en  avant,  il  s'en  fera  de  plus  grans,  comme  nous  l'experimentons  tous  les  iours.  Or  puis  que  nous  avons  le  sens  du  Prophete,  il  nous  faut  regarder  de  l'applicquer  a  nostre  usage.  En  premier  lieu,  quand  il  est  dit  que  Dieu  espandra  son  Esprit  sur  toute  chair,  il  faut  noter  que  c'est  le  plus  grand  bien  que  nous  puissions  avoir  que  d'estre  participans  des  graces  de  son  S.  Esprit.  Et  c'est  le  don  le  plus  excellent  que  Dieu  face  aux  hommes,  au  pris  duquel  toute  la  liberalite  qu'il  monstre  par  les  choses  terriennes  n'est  rien.  Car  quand  nous  sommes  privez  de  ce  don,  Iesus  Christ  nous  est  oste,  et  iusques  a  tant  que  nous  en  soyons  revestus  tout  ce  que  nous  faisons  est  a  nostre  condamnation.  Et  aussi  Dieu  prononce  que  nous  ne  pouvons  estre  ses  enfans  que  nous  ne  soyons  arrousez  de  son  S.  Esprit.  Or  si  nous  ne  sommes  ses  enfans,  nous  ne  participons  en  rien  a  la  communication  de  Iesus  Christ.  Car  combien  que  Dieu  nous  presente  de  ses  graces,  ce  neantmoins  Iesus  Christ  ne  nous  est  rien  iusques  a  ce  que  nous  ayons  receu  le  S.  Esprit.  Concluons  donc  par  cela  que,  iusques  a  ce  que  nous  soyons  participans  du  S.  Esprit,  nous  sommes  perdus  et  reprouvez:  car  c'est  celuy  qui  nous  sanctifie  et  qui  fait  que  nous  sommes  saincts  devant  Dieu.  Ainsi  donc,  iusques  a  ce  qu'il  nous  ait  appelez  a  soy,  par  la  cognoissance  de  sa  saincte  Escriture  (laquelle  nous  ne  pouvons  avoir  que  par  don  de  l'Esprit)  pour  eslever  nos  esprits  en  haut,  nous  sommes  detenus  en  la  terre  comme  en  un  enfer.  Et  c'est  ce  que  dit  S.  Paul,  que  ceux  qui  ont  receu  le  sainct  Esprit,  et  se  conduisent  selon  la  volonte  de  Dieu  qui  nous  est  declaree  par  sa  Parolle,  ceuxla,  di-ie,  sont  enfans  de  Dieu:  mais  ceux  sont  enfans  du  diable  qui  suyvans  leurs  affections  charnelles  ne  s'addonnent  a  autre  chose  qu'a  volupte.  Voyla  donc  comme  la  cognoissance  de  la  verite  de  Dieu  nous  est  necessaire,  si  nous  voulons  estre  du  nombre  de  ses  enfans.  Au  reste,  il  ne  faut  point  que  nous-nous  excusions  si  nous  ne  recevons  de  ses  graces:  car  il  les  presente  a  tous:  mais  nous  sommes  si  malheureux  que  nous  refusons  le  bien  qu'il  nous  veut  faire.  Et  en  cela  on  cognoist  la  bonte  de  Dieu  envers  les  hommes  que,  combien  qu'ils  soyent  tousiours  repugnans  a  sa  volonte,  il  ne  laisse  pas  pourtant  de  se  presenter  a  tous:  comme  il  est  yci  dit  par  le  Prophete  que  ieunes  et  vieux,  hommes  et  femmes  receveront  tous  d'un  mesme  Esprit.  Et  c'est  afin  qu'on  n'allegue  point:  Ha,  ie  ne  suis  point  clerc,  ie  ne  puis  donc  comprendre  ce  qui  est  en  l'Ecriture,  pour  recevoir  le  sainct  Esprit.  Voire,  et  Dieu  a-ii  promis  seulement  aux  clercs  la  grace  de  son  sainct