35:642  ressusciter.  Cognoissons  donc,  d'autant  que  le  Fils  de  Dieu  non  seulement  en  son  essence  et  en  sa  maieste  Divine  est  immortel,  mais  aussi  en  sa  chair  et  en  sa  nature  humaine,  que  c'est  afin  que  l'Eglise  soit  tousiours  gardee  en  ce  monde,  et  qu'elle  ne  perisse  iamais.  Il  nous  faut  donc  estre  asseurez  de  l'estat  permanent  de  l'Eglise,  quand  nous  serons  fondez  sur  ce  passage.  Il  est  vray  que  nous  verrons  de  grans  troubles,  et  semblera  souvent  que  l'Eglise  de  Dieu  doyve  perir:  car  il  ne  faut  qu'un  orage  se  lever,  et  les  vagues  seront  si  grandes  et  si  horribles,  qu'on  dira,  C'en  est  fait,  tout  est  perdu.  Et  nous  le  voyons  par  experience.  Quelle  apparence  y  a-il  que  l'Eglise  de  Dieu  soit  maintenue,  quand  elle  est  ainsi  assaillie  de  tous  cotez?  Quand  il  y  a  tant  d'assaux,  ne  semble-il  pas  qu'elle  doyve  estre  abysmee  du  tout?  Mais  tant  y  a  qu'il  nous  faut  venir  au  chef.  Et  puis  que  l'aage  de  nostre  Seigneur  Iesus  Christ  ne  finit  point,  et  qu'il  n'y  a  nul  changement  qui  empesche  qu'il  n'ait  tousiours  esgard  a  bien  garder  son  Eglise,  encores  qu'il  y  ait  des  tentations  beaucoup  plus  grandes  et  plus  violentes  qu'elles  ne  sont,  asseurons-nous  toutesfois.  Et  ne  faut  pas  applicquer  cela  seulement  a  toute  la  communaute  des  fideles,  mais  aussi  a  chacun  de  nous.  Que  donc  nous  scachions  et  soyons  bien  persuadez,  encores  que  nostre  vie  ne  soit  qu'un  souffle,  et  que  nous  soyons  prests  a  chacune  minute  d'estre  esvanouis,  que  toutesfois  nous  avons  une  vie  permanente,  d'autant  que  nous  sommes  membres  de  nostre  Seigneur  Iesus  Christ.  Et  au  reste  apprenons  quant  et  quant  de  passer  par  ce  monde,  puis  qu'ainsi  est  que  ce  n'est  pas  nostre  vie  que  celle  dont  nous  iouissons  a  present,  mais  un  passage  par  lequel  il  nous  faut  courir  viste,  iusques  a  ce  que  nous  soyons  parvenus  au  repos  de  nostre  heritage.  Voyla  donc  comme  en  esperant  la  vie  eternelle,  il  nous  faut  quitter  tout  ceci,  qui  n'est  rien  qu'un  ombrage:  et  faut  que  nos  sens  ne  soyent  point  enveloppez  en  tout  ce  qui  nous  est  apparent,  et  qui  pourroit  nous  faire  demeurer  en  ce  monde:  car  tous  ceux  qui  s'y  arrestent,  il  est  certain  qu'ils  se  separent  par  ce  moyen  du  Fils  de  Dieu,  et  se  rendent  indignes  d'avoir  nulle  part  ne  portion  en  son  eternite.  Ainsi  donc  retirons  nous  de  ce  monde,  si  nous  voulons  estre  conioints  au  Fils  de  Dieu.  Au  reste,  afin  que  ceste  doctrine  eust  plus  de  vigueur  et  de  vehemence  envers  nous,  le  Prophete  s'escrie:  il  ne  prononce  pas  seulement  que  l'aage  de  nostre  Seigneur  Iesus  Christ  sera  eternel,  mais  il  se  iette  la  comme  un  homme  tout  esbahi,  qui  racontera  son  aage?  Ainsi  donc  nous  sommes  admonestez  de  batailler  contre  toutes  tentations,  et  si  nous  sommes  quelquesfois  empeschez  ca  et  la,  si  nous  sommes  outre  l'agitation  quasi  abbatus,  41