8:640  formidinis  speciem  Abrahae  et  Davidi  tribuit,  qunrn  mortui  sunt.  Et  tamen  pagina  235,  eos  qui  ante  Christi  mortem  mortui  sunt  detrusos  ad  infernum  suisse  docens,  quasi  oblivioni  a  Deo  traditi  forent,  paucos  excipere  se  addit,  quos  futuri  Christi  spes  fovebat.  Sed  quinam  sunt  illi  pauci,  inter  quos  ne  extremum  quidem  angulum  Abrahae  et  Davidi  relinquit?  Denique  generaliter  ita  loquitur,  praedam  daemonis  fuisse  pias  animas,  quibus  tandem  liberator  apparuit  Christus.  Caeterum  quid  post  mortem  adepti  fuerint,  non  disputo:  quia  mihi  sufficit  privari  eos  spirituali  gratia  quamdiu  vixerunt.  Aperta  autem  sunt  Serveti  verba  pagina  460,  quod  in  nullo  patriarcharum  vel  prophetarum  requievit  spiritus  Christi:  nemo  ante  adventum  eius  donatus  fuit  spiritu  regenerationis  sancto.  Si  quis  roget  undenam  didicerint  prophetae  quae  prodita  sunt  eorum  oraculis:  respondet  Petrus,  Christi  spiritu  fuisse  illis  revelata  (1.  Petr.  1,12).  Sed  de  ipsa  voce  litem  movere  supervacuum  est:  quia  ut  centies  crepet  spiritus  Serveti,  quicunque  non  regeniti  sunt  vivifico  spiritu,  eos  in  aeternum  interitum  damnari  constat.  Unde  autem  vivificus  spiritus,  nisi  ab  ipsa  vita?  Nunc  Iudaeis  aliquam  salutem  tribuat  Servetus  iudicii  finalis  [pag.  257]  intuitu,  sicuti  et  ethnicis  tribuit  pagina  193.  Quia  tamen  nobis  nulla  a  Deo,  nisi  per  regenerationis  spiritum  promittitur  salus,  iure  notata  fuit  a  me  Serveti  impietas,  a  quo  spiritum  illum  patribus  ereptum  esse  doceo.  Superest  caput  unum  de  imaginaria  resurrectione:  in  quo  tacite  se  Libertinum  fatetur,  quum  sibi  a  me  fieri  iniuriam  dissimulet.  Nec  certe  dubium  est  in  flexuosis  eius  ambagibus  aliquid  occulti  veneni  subesse.  Capite  autem  quarto  libri  de  Fide  et  iustitia,  non  modo  oblique  insinuat  errorem  suum,  sed  palam  libertinizat.  Caeterum  ne  spinosae  Serveti  argutiae  rudiores  quosdam,  et  sacrarum  rerum  minus  peritos,  ut  sparsim  hactenus  fuerunt  agitatae,  perplexos  teneant,  facturus  mihi  operae  pretium  videor,  si  breve  earum  compendium  ex  confusa  farragine  collectum  ante  oculos  ponam.  Qualis  sit  Deus  Serveto.  Deum  sibi  fingit,  qui  in  mundi  creatione  verbum  et  spiritum  proferre  coepit,  ac  tunc  personam  induit,  visibilem  se  faciens  in  tribus  elementis  increatis.  Interim  tamen  deitatem  suam  ita  creaturis  omnibus  fecit  communem,  ut  sit  lapis  in  lapide,  lignum  in  ligno.  Tandem  vero  post  Christum  manifestatum  in  tres  essentias  divisus  sit,  maneat  tamen  unus  Deus:  quia  haec  dispensatio  nihil  in  eo  mutat.