35:640  restions  plenement  nostre  fiance  en  luy,  et  que  nous  ne  despitions  hardiment  le  diable  et  le  peche:  veu  que  Iesus  Christ  a  triomphe  par  dessus,  et  que  la  main  de  Dieu  l'a  soustenu  pour  l'exempter  des  angoisses:  et  que  de  la  mesmes  il  a  este  exalte  pour  estre  lieutenant  de  Dieu  son  Pere:  et  (comme  i'ay  desia  dit)  pour  avoir  empire  souverain  au  monde.  C'est  donc  en  somme  ce  que  nous  avons  a  retenir,  quand  il  est  dit  qu'il  a  este  esleve  de  la  prison  et  de  iugement.  Or  il  a  bien  falu  que  nostre  Seigneur  Iesus  descendist  iusques  aux  abysmes  devant  qu'estre  exalte  en  la  gloire  des  cieux:  car  s'il  fust  seulement  apparu  en  sa  maieste,  comment  auiourd'huy  pourrions-nous  estre  asseurez  que  nos  pechez  nous  sont  remis?  Nous  verrions  le  Fils  de  Dieu  qui  est  la  fontaine  de  vie,  mais  il  seroit  comme  separe  de  nous,  et  nous  n'aurions  rien  de  commun  avec  luy,  nous  n'en  pourrions  approcher.  D'avantage  nous  aurions  tousiours  matiere  de  nous  desesperer,  d'autant  que  nous  sommes  coulpables  de  fautes  infinies.  Si  donc  nostre  Seigneur  Iesus  fust  descendu  aux  abysmes  sans  estre  esleve  aux  cieux,  que  seroit-ce?  Nous  demeurerions  tousiours  comme  povres  gens  transsis,  et  serions  en  inquietude  sans  fin  et  sans  cesse:  nous  serions  en  un  torment  horrible,  voyans  que  l'ire  de  Dieu  seroit  tousiours  sur  nous.  Mais  quand  il  est  dit  en  premier  lieu  qu'il  a  este  condamne  et  qu'il  a  souffert  sde  terribles  angoisses,  afin  que  nous  en  fussions  affranchis,  et  qu'ayans  paix  envers  Dieu  (comme  il  en  fut  hier  traitte)  nous  scachions  maintenant  qu'il  nous  aime,  nous  est  favorable,  et  nous  recoit  a  merci.  Quand  donc  nous  scavons  que  Iesus  Christ  a  este  esleve  de  la,  nous  pouvons  aussi  bien  conclure,  que  ca  este  pour  nous  tirer  a  luy,  afin  que  nous  soyons  participans  de  la  gloire  qui  luy  a  este  donnee  de  Dieu  son  Pere.  Au  reste  il  nous  faut  aussi  noter  ce  que  le  Prophete  adiouste,  qui  est-ce  qui  racontera  son  aage?  Car  par  ceci  il  veut  monstrer  que  la  resurrection  de  nostre  Seigneur  Iesus  Christ  ha  son  effet  et  sa  vertu  a  perpetuite:  et  que  ce  n'est  pas  une  chose  temporelle,  qui  s'escoule  et  qui  s'esvanouisse  tantost.  Et  ceci  est  encores  bien  necessaire:  car  aucuns  ont  prins  cest  aage  pour  la  generation  eternelle  de  nostre  Seigneur  Iesus  Christ,  d'autant  qu'il  a  este  engendre  de  Dieu  son  Pere  de  toute  eternite.  Les  autres  ont  tire  et  ca  et  la  ces  mots  du  Prophete:  mais  quand  tout  sera  regarde  de  pres  il  n'y  a  nulle  doute  qu'il  n'ait  voulu  monstrer  que  la  hautesse  qui  a  este  donnee  a  Iesus  Christ  n'a  pas  este  pour  luy  et  pour  sa  personne:  d'autre  coste  que  ce  n'a  pas  este  pour  un  iour  seulement,  mais  qu'il  nous  a  acquis  vie  permanente  comme  S.  Paul  dit  qu'il  est  mort  une  fois  a  peche  mais  que  maintenant  il  vit  a  Dieu  et  ne  mourra  iamais.  Par