54:64  au  nom  de  Iesus  Christ  ce  que  Dieu  voudra,  voire  d'autant  que  la  vie  nous  est  mise  devant  les  yeux,  que  nous  en  avons  une  cognoissance  plus  prochaine  et  plus  familiere  que  n'ont  pas  eu  les  Peres  anciens.  Or  la  dessus  regardons  ce  qui  est  dit  par  l'apostre  en  l'Epistre  aux  Hebrieux.  Si  nous  lisons  comme  les  Peres  anciens  n'ont  iamais  flechi,  et  qu'ils  ont  eu  une  vertu  admirable,  nous  serons  contraints  d'estre  ravis  en  estonnement.  Nous  scavons  comme  ils  ont  este  tourmentez  des  tyrans  et  ennemis  de  la  verite,  et  comme  ils  ont  tous  constamment  endure:  la  condition  de  l'Eglise  n'est  pas  auiourd'huy  plus  dure  ne  plus  facheuse  a  porter  qu'elle  estoit  adonc.  Puis  qu'ainsi  est,  ferons-nous  difficulte  de  marcher  apres  Iesus  Christ,  qui  nous  a  monstre  le  chemin?  Mais  afin  que  nous  ne  soyons  point  lasches  ne  trop  froids,  notons  bien  qu'il  dit  que  Iesus  Christ  nous  a  mis  la  vie  et  l'immortalite  en  lumiere  par  l'Evangile:  que  toutesfois  et  quantes  qu'on  nous  presche  de  la  grace  de  Dieu,  est  autant  comme  si  le  royaume  des  cieux  nous  estoit  ouvert,  si  Dieu  nous  tendoit  ia  main,  et  qu'il  nous  certifiast  que  la  vie  nous  est  prochaine,  et  qu'il  nous  veut  faire  participans  de  son  heritage  celeste:  Et  cela  nous  est  dit,  pource  que  iusques  a  ce  que  nous  ayons  veu  Iesus  Christ,  nous  elevant  en  haut  avec  luy  pour  nous  mener  a  une  vie  certaine,  nous-nous  arresterons  tousiours  a  ceste  vie  presente,  nous  voudrons  demeurer  au  monde,  et  ce  sera  par  force  quand  on  nous  en  tirera.  Mais  quand  nous  regarderons  a  ceste  vie  qui  nous  a  este  acquise  par  nostre  Seigneur  Iesus  Christ,  il  ne  nous  coustera  rien  de  quitter  tout  ce  qui  nous  peut  retenir  ici  bas,  pour  aspirer  la  haut  au  ciel.  Et  ainsi  doncques  que  nous  ne  soyons  point  aveugles  volontaires  quand  Iesus  Christ  iournellement  nous  propose  la  vie  et  l'immortalite  dont  il  est  ici  parle.  Et  notons  bien  quand  sainct  Paul  parle  de  la  vie,  et  qu'il  adiouste  l'immortalite,  que  c'est  autant  comme  s'il  disoit  que  nous  entrons  desia  au  royaume  de  Dieu  par  foy:  combien  que  nous  soyons  comme  estrangers  ici  bas,  et  qu'il  semble  qu'il  n'y  ait  que  mort  et  malediction  en  nous,  que  toutesfois  la  vie  et  la  grace  qui  nous  est  communiquee  par  nostre  Seigneur  Iesus  Christ,  apportera  son  fruict  en  temps  opportun,  c'est  ascavoir  quand  il  sera  envoye  derechef  de  Dieu  son  Pere  pour  nous  monstrer  l'effect  des  choses  qui  nous  sont  iournellement  preschees,  et  qui  ont  este  accomplies  en  sa  personne,  cependant  qu'il  a  vestu  nostre  nature  humaine.  Or  nous-nous  prosternerons  devant  la  face  de  nostre  bon  Dieu,  etc.