44:64  iam  sensum  verborum.  Sed  videri  absurdum  posset,  quod  propheta  oblivione  dicit  tecta  fore  scelera,  quae  tamen  subinde  et  fere  singulis  momentis  debuerant  Iudaei  secum  reputare:  quemadmodum  dicit  etiam  Ezechiel  (16,  61),  Tunc  recordaberis  viarum  tuarum,  et  erubesces:  nempe  ubi  placatus  fuerit  Deus.  Ezechiel  fructum  poenitentiae  fore  dicit,  ut  fideles  pudore  suffusi  se  ipsos  damnent.  Quare?  nam  reprobi  quasi  clausis  oculis  pergunt  in  suis  sceleribus  :  et  quemadmodum  paulo  ante  dictum  fuit,  nesciunt  pudorem  :  etiamsi  Deus  illis  exprobret  quae  peccarunt,  perfricta  fronte  contemnunt  et  respuunt  omnem  doctrinam  :  imo  recalcitrant  adversus  stimulos.  Quum  ita  sit,  merito  dicit  Ezechiel  pudorem  esse  verum  poenitentiae  fructum:  quemadmodum  etiam  loquitur  Paulus  sexto  ad  Romanos  capite  (v.  21),  In  quibus  nunc  erubescitis  :  significat  quum  demersi  essent  in  sua  incredulitate,  fuisse  ita  deditos  suis  flagitiis,  ut  nullum  foetorem  sentirent.  Coeperunt  igitur  erubescere  postquam  illuminati  sunt.  Nunc  videtur  propheta  rescindere  fructum  illum  a  poenitentia.  Sed  aliter  intelligi  debet  quod  dicit,  nempe  tunc  puram  fore  ecclesiam  ab  ignominia:  quoniam  segregati  erunt  reprobi,  hoc  est,  ablatae  erunt  omnes  sordes  ubi  Deus  collegerit  sibi  tantum  reliquias:  quoniam  hoc  modo,  sicuti  dictum  fuit,  separabitur  triticum  a  palea.  Non  erubesces  ergo  in  die  illa  a  sceleribus:  quia  tollam  e  medio  tui  qui  exsultant.  Ostendit  quam  necessaria  sit  ista  imminutio  :  quoniam  pereundum  esset  omnibus,  nisi  Deus  abscinderet  putrida  membra.  Remedium  ergo  quamvis  asperum  sit  et  dolore  plenum,  tamen  tolerabile  videri  debet:  quoniam  non  posset  aliter  ecclesia  servari:  hoc  est,  corpus  ipsum.  Sed  videtur  hic  rursus  posse  obiici,  non  ideo  ecclesiam  abstergi  ab  omni  macula,  quoniam  tollantur  reprobi.  Dicit  enim,  Non  erubesces  a  sceleribus  quae  in  me  peccastis  ad  verbum  :  hoc  est,  quibus  transgressa  es  contra  me.  Alloquitur  hic  Deus  fideles  ipsos.  Ergo  non  agitur  de  eorum  sceleribus,  quos  Dominus  abdicavit.  Sed  facilis  solutio  est.  Quum  enim  dicit  ecclesiam  peccasse,  respicit  ad  illam  permixtionem,  quae  facit  ut  nullum  sit  discrimen  inter  triticum  et  paleam.  Dicemus  urbem  esse  impiam  et  sceleratam,  ubi  maior  pars  obruit  bonos,  sic  ut  non  appareant.  Si  ergo  inter  decem  millia  hominum  sunt  vel  trecenti  vel  pauciores,  qui  cupiant  omnia  melius  habere:  tamen  in  genere  totus  numerus  sceleratus  censebitur  a  maiori  parte,  quum  alii  latent  quasi  obruti  et  sepulti.  Merito  itaque  et  proprie  Sophonias  pronuntiat  transgressos  fuisse  Iudaeos  contra  Deum,  quia  in  promiscua  multitudine  non  poterant  discerni  electi  a  reprobis.  Sed  iam  promittit  fore  discrimen,  ubi  scilicet  Deus  abstulerit  superbos,  qui  exsultabant  in  fallaci  iactantia.  Dicit  enim  Auferam  e  medio  tui  exsultantes  superbia