40:64  negotium  habebit  cum  gente  perversa  et  immorigera  :  deinde  quod  trahitur  in  certamen  tam  odiosum  :  tertio  quod  iubetur  quodammodo  proiicere  sanctum  canibus,  et  margaritas  ante  porcos,  et  ita  prostituere  quodammodo  sermonem  Dei:  certe  potuit  centies  animum  despondere  quum  apud  se  haec  expenderet.  Atqui  consilium  Dei  tamen  fuit,  ipsum  invicta  constantia  armare,  ut  pergeret  in  cursu  suae  vocationis.  Tenendum  igitur  principium  est,  ubi  Deus  vuit  nos  ad  parendum  excitare,  non  semper  promittere  felicem  exitum  laboris:  sed  aliquando  eo  usque  probare  nostrum  obsequium,  ut  velit  nos  contentos  esse  suo  mandato,  etiam  si  labor  noster  sit  ridiculus  secundum  homines.  Interdum  quidem  indulget  nostrae  infirmitati:  et  quum  iubet  nos  aliquod  opus  suscipere,  simul  testatur  se  non  passurum  ut  labor  noster  pereat,  et  industria  prorsus  careat  fructu:  tunc  ergo  Deus  nobis  parcit.  Sed  sumit  aliquando  examen  de  suis  quod  dixi,  nempe  qualiscunque  futurus  sit  eventus,  ut  tamen  satis  illis  sit  paruisse  eius  mandato.  Et  ex  hoc  loco  facile  colligimus  sic  examinatum  fuisse  prophetam  nostrum.  Idem  etiam  legimus  de  Isaia.  Nam  ubi  mittitur  a  Deo,  non  tantum  audit  se  verba  facturum  apud  surdos,  sed  durius  est  longe  quod  Deus  proponit:  Eas,  inquit  (6,  9),  excaeca  cor  populi  huius,  aggrava  aures,  et  cor  obstina.  Non  tantum  ergo  videt  Isaias  se  fore  expositum  ludibrio,  quia  nihil  proficiet  suo  labore,  sed  videt  sermonem  suum  non  alio  spectare,  nisi  ad  excaecandos  Iudaeos:  nisi  denique  ut  bis  et  ter  pereant.  Atqui  satis  erat  unus  interitus.  Sed  quemadmodum  iam  dixi,  Deus  aliquando  servos  suos  ita  vult  acquiescere  suo  imperio,  ut  laborent  etiam  absque  ulla  spe  fructus.  Et  hoc  diligenter  notandum  est.  Quoties  enim  vocamur  a  Deo,  antequam  nos  accingamus  veniunt  in  mentem  istae  cogitationes,  Quis  tandem  erit  finis?  et  quid  consequar  meo  labore?  Ubi  autem  exitus  non  apparet  ex  voto  animi  nostri,  despondemus  animos.  Atqui  hoc  est  abrogare  Deo  partem  imperii  sui.  Quamvis  enim  labor  noster  sit  inutilis,  satis  est  gratum  esse  ipsi  Deo.  Ergo  discamus  relinquere  eventum  in  manu  Dei,  ubi  aliquid  nobis  iniungit.  Et  quamvis  totus  mundus  nos  derideat,  quamvis  etiam  desperatio  ipsa  nos  ignavos  reddat,  animos  tamen  colligamus,  et  enitamur  quidquid  sit:  quia  sufficere  nobis  debet,  obsequium  nostrum  gratum  esse  Deo.  Hac  ratione  dicit  Paulus  evangelium,  quamvis  sit  odor  mortis  in  mortem,  suaviter  tamen  olere  coram  Deo  (2.  Oor.  2,  15).  Quum  dicitur  evangelii  doctrinam  esse  mortiferam,  posset  statim  suggerere  nobis  sensus  noster  nihil  esse  melius,  quam  eam  relinquere.  Ergo  Paulus  occurrit,  et  dicit  non  debere  fieri  iudicium  de  evangelio  ab  ipso  successu.  Quamvis  ergo  non  tantum  surdi  maneant  homines,  sed  etiam  in  deterius  labantur,  imo  ruant  praecipiti