35:64  faut  que  les  fideles  se  contentent  de  ce  qui  leur  est  revele,  et  que  voila  une  sagesse  plus  grande  et  meilleure  beaucoup,  que  s'ils  vouloyent  s'enquerir  du  tout  indifferemment.  Voila  pour  le  second.  Or  le  troisieme  est  que  Dieu  nous  tient  ainsi,  non  pas  qu'il  soit  chiche  de  nous  declarer  plus  outre  sa  volonte,  mais  il  cognoist  ce  qui  nous  est  propre.  Et  ainsi  donc  notons  bien  que  Dieu  nous  enseigne  pour  nostre  edification.  Qu'est-ce  donc  que  de  la  mesure  de  foi?  Qu'est-ce  de  la  doctrine  de  l'Escriture  saincte?  C'est  une  regle  que  Dieu  cognoist  nous  estre  bonne  a  salut:  et  il  ne  faudra  point  que  les  hommes  se  plaignent  quand  ils  auront  cognu  ce  qui  est  contenu  en  l'Escriture  saincte,  et  que  tous  les  iours  on  nous  declare  aux  sermons.  Quand  les  hommes  auront  cognu  cela,  o  il  ne  faut  pas  qu'ils  se  plaignent,  comme  s'ils  n'avoyent  point  assez  entendu:  car  tout  ce  qui  nous  a  este  bon  et  propre  nostre  Seigneur  nous  l'a  declare.  Ainsi  donc  quand  nous  voyons  que  Dieu  a  commande  sa  parole  nous  estre  portee,  et  qu'il  ne  nous  a  rien  voulu  cacher  de  ce  qui  estoit  pour  nostre  salut:  nous  avons  tant  plus  a  lui  rendre  graces  de  ce  qu'il  s'est  revele  privement  a  nous,  nous  avons  dequoi  nous  contenter,  et  non  point  estre  curieux:  comme  nous  en  voyons  beaucoup  qui  se  veulent  enquerir  outre  mesure:  et  les  Papistes  ont  eu  cela,  que  d'un  coste  ils  disent,  O  il  ne  se  faut  point  enquerir  des  secrets  de  Dieu:  et  ils  ont  reiette  l'Escriture  saincte  sous  ceste  ombre  la:  et  d'autre  coste  ils  ont  eu  ceste  folle  curiosite  de  s'enquerir  des  choses  qui  ne  leur  appartiennent  pas:  ils  ont  eu  ces  folles  resveries,  pour  dire,  Et  qu'est-ce  de  telle  chose?  Comment  cela  se  fait-il?  Bref,  ils  ne  se  sont  contentez  de  rien,  mesmes  toute  l'Escriture  saincte  ne  leur  a  este  sinon  un  A,  B,  C.  Car  ils  n'ont  point  eu  honte  de  desgorger  ce  blaspheme  diabolique,  Que  quand  nous  avons  ce  qui  est  en  l'Escriture  saincte,  ce  n'est  point  encores  assez,  mais  qu'il  y  a  eu  des  mysteres  que  Dieu  a  reservez  a  son  Eglise.  Et  ou  ont-ils  forge  tout  cela?  Tout  ainsi  que  Mahumet  a  dit  que  son  Alcoran  estoit  la  grande  perfection:  aussi  le  Pape  dit  qu'il  y  a  des  secrets  qui  luy  ont  este  reservez  par  dessus  l'Escriture  saincte.  Quelle  honte?  Or  cependant  nous  sommes  ici  advertis  pourquoy  c'est  que  nostre  Seigneur  a  compasse  la  doctrine  qu'il  nous  donnoit,  a  nostre  portee  et  mesure,  qu'il  nous  en  faut  contenter,  qu'il  ne  faut  point  que  nous  apportions  ici  nos  appetits  volages,  pour  dire,  Et  comment  ceci  va-il?  Car  qui  sommes-nous?  Et  ainsi  escoutons  Dieu  parler,  ouvrons  les  yeux,  et  recevons  ce  qu'il  nous  monstre,  et  ce  qu'il  nous  dit  par  sa  parole.  Et  puis  sommes-nous  venus  au  bout  de  cela?  Tenons-nous  cois:  car  il  nous  monstre  comme  il  nous  faut  mettre