2:64  [CO  2.64]  tam  mirifice  vindicata  fuit  eius  autoritas;  quod  lapis  virga  percussus  flumen  protinus  eiecit;  quod  man  e  coelo  ad  eius  precationem  depluit:  nonne  hinc  Deus  ipsum  coelitus  commendabat  tanquam  indubium  prophetam?  Si  quis  obiiciat  me  sumere  pro  confessis  quae  controversia  non  careant,  huius  cavilli  facilis  est  solutio.  Nam  quum  haec  omnia  pro  concione  publicaverit  Moses,  quis  fingendi  locus  fuit  apud  ipsos  rerum  gestarum  oculatos  testes?  Scilicet  prodiisset  in  medium,  ac  populum  infidelitatis,  contumaciae,  ingratitudinis  aliorumque  scelerum  coarguens,  suam  doctrinam  sub  ipsorum  conspectu  iactasset  sancitam  fuisse  iis  miraculis  quae  ipsi  nunquam  vidissent.  [Inst  1.8.6.]  Nam  et  hoc  notatu  dignum,  quoties  narrat  de  miraculis,  simul  odiose  coniungi  quae  totum  populum  stimulare  ad  reclamandum  poterant,  si  vel  minima  fuisset  occasio.  Unde  apparet  non  aliter  ut  subscriberent  fuisse  adductos,  nisi  quia  plus  satis  convicti  erant  sua  experientia.  Caeterum  quoniam  res  erat  illustrior  quam  ut  profanis  scriptoribus  liberum  esset  negare  edita  fuisse  a  Mose  miracula,  calumniam  illis  suggessit  pater  mendacii,  ea  magicis  artibus  adscribens.  Sed  qua  coniectura  magum  fuisse  insimulant  qui  tantopere  ab  hac  superstitione  abhorret,  ut  lapidibus  obruere  iubeat  qui  tantum  consuluerit  magos  et  ariolos?  Certe  nemo  impostor  praestigiis  ludit,  qui  non  obstupefacere  vulgi  animos  studeat,  captandae  famae  causa.  Quid  autem  Moses  ?  se  et  fratrem  Aaronem  nihil  esse  clamans,  sed  tantum  exsequi  quae  Deus  praescripsit,  satis  abstergit  omnem  sinistram  notam.  Iam  si  res  ipsae  considerentur,  quaenam  incantatio  facere  potuit  ut  man  e  coelo  quotidie  pluens  ad  populum  alendum  sufficeret?  si  quis  plus  iusta  mensura  repositum  haberet,  ex  ipsa  putredine  disceret  incredulitatem  suam  divinitus  puniri?  Adde  quod  multis  seriis  probationibus  sic  examinari  passus  est  Deus  servum  suum,  ut  nunc  obstrependo  nihil  proficiant  improbi.  Quoties  enim  superbe  et  petulanter  nunc  surrexit  totus  populus,  nunc  quidam  inter  se  conspirando  sanctum  Dei  servum  evertere  conati  sunt,  eorum  furorem  praestigiis  eludere  qui  potuit?  Et  eventus  palam  docet,  hoc  modo  sancitam  in  omnia  saecula  fuisse  eius  doctrinam.  [Inst  1.8.7.]  Ad  haec  quod  tribui  Iuda  in  persona  patriarchae  Iacob  assignat  principatum  (Gen.  49,  10),  quis  neget  spiritu  prophetico  factum  esse,  praesertim  si  rem  ipsam,  ut  eventu  comprobata  fuit,  cogitationi  nostrae  subiicimus?  Finge  Mosen  primum  esse  vaticinii  autorem:  ex  quo  tamen  scriptum  hoc  memoriae  prodidit,  praetereunt  anni  quadringenti  quibus  nulla  est  in  tribu  Iuda  sceptri  mentio.  Post  Saulem  inauguratum  videtur  regia  potestas  in  tribu  Beniamin  residere.  Quum  a  Samuele  ungitur  David,  quaenam  eius  transferendae  ratio  apparet?  Quis  regem  sperasset  ex  plebeia  hominis  pecuarii  domo