48:639  639  SERMONS  640  qu'il  est  la  tierce  heure  du  iour.  Or  maintenant  il  applique  le  miracle  qui  avoit  este  fait,  a  sa  doctrine.  Car  le  sainct  Esprit  n'avoit  pas  este  donne  aux  Apostres  pour  se  taire,  quand  il  seroit  question  de  magnifier  les  oeuvres  de  Dieu:  mais  il  faloit  qu'ils  fussent  fermes  pour  porter  constamment  la  Parolle,  et  publier  l'Evangile,  ainsi  que  nostre  Seigneur  leur  en  donnoit  le  moyen.  Aussi  nous  voyons  que  Dieu  a  besongne  grandement,  et  que  cela  n'est  point  procede  des  hommes,  que  l'Evangile  ait  este  presche  en  Puniversel  monde  par  un  si  petit  nombre  de  gens.  Maintenant  S.  Pierre  en  sa  predication  monstre  une  saincte  hardiesse  de  l'Esprit  de  Dieu,  et  advertit  ceux  qui  s'estoyent  mocquez  du  miracle,  et  qui  ne  l'avoyent  receu  en  reverence,  que  Iesus  Christ  ne  se  manifeste  point  a,  ceux  qui  ont  ses  oeuvres  en  derision  et  mocquerie.  Au  reste,  disant  Et  vous  tous  qui  habiter  en  Ierusalem,  il  parle  en  commun  a  tous:  et  toutesfois  cela  ne  competoit  qu'a  d'aucuns,  ascavoir  a  ceux  qui  s'estoyent  mocquez  du  miracle.  Car  il  y  en  avoit  plusieurs  pour  lors  en  la  compagnie  des  Apostres  qui  s'estoyent  grandement  esbahis  et  y  estoyent  venus  en  reverence.  Pourquoy  est-ce  donc  que  S.  Pierre  leur  attribue  a  tous  qu'ils  s'en  sont  mocquez?  Or  c'est  qu'en  reprenant  le  vice  de  ceux-la  il  a  voulu  profiter  a  toute  la  compagnie,  et  par  ceste  occasion  confermer  tant  plus,  es  coeurs  des  autres  qui  s'esbahissoyent,  une  admiration  et  reverence  de  l'oeuvre  de  Dieu,  en  reiettant  loin  l'opinion  de  ces  mocqueurs  et  toutes  autres  folles  fantasies.  Encores  auiourd'huy  nous  en  userons  ainsi:  car  s'il  y  a  des  mocqueurs  en  une  compagnie,  et  nous  voulons  reprendre  ce  vice,  nous  crierons  a  l'encontre  de  tous,  combien  que  tous  n'en  soyent  chargez.  Cependant  ceux  qui  en  sont  coulpables  doyvent  estre  convaincus  en  leur  conscience:  car  ils  ont  assez  de  tesmoignage  de  leur  mesfait,  sans  qu'on  leur  face  leur  proces,  et  qu'on  leur  declare  par  le  menu.  Neantmoins  quelques  fois  il  est  besoin  qu'on  parle  aux  gens  de  plus  pres,  et  qu'on  les  taxe  comme  les  nommant,  pour  leur  reduire  en  memoire,  et  leur  monstrer  comme  a  l'oeil  et  au  doigt  leurs  fautes:  car  ils  ont  alors  plus  grand'honte  que  si  on  les  redarguoit  en  commun.  Mais  c'est  merveilles  qu'il  y  en  aura  aucuns  qui  ne  peuvent  porter  qu'on  redargue  quelque  vice,  combien  que  ce  soit  en  commun:  car  ils  se  voudront  couvrir,  disans  que,  combien  qu'il  y  en  ait  plusieurs  coulpables  du  vice  duquel  on  parlera,  il  y  en  a  toutesfois  qui  en  sont  innocens.  Ainsi  on  orra  les  murmures,  A  quel  propos  crie  on  ainsi  contre  tous?  S'il  y  en  a  qui  sont  tels,  est-ce  a  dire  qu'il  faille  reprendre  tous  les  autres  et  parler  ainsi  en  commun?  Voyla  comme  les  hommes  trouvent  tousiours  occasion  de  murmurer  contre  la  doctrine,  et  toutesfois  nous  voyons  que,  combien