9:638  extendere,  quia  tametsi  Deus  sit  aeternus,  quum  tamen  ad  nos  descendit,  medius  esse  coepit  inter  Deum  et  nos.  Hac  ratione  vocatur  pater  unus  Deus,  quia  Christus  carne  circumdatus  sic  ecclesiae  praeest,  ut  Deum  habeat  caput,  quemadmodum  Paulus  docet  (1.  Cor.  l  l  ,  3).  Hoc  etiam  modo  Deus  mediate  nos  per  manum  filii  sui  gubernat,  donec  perducti  simus  ad  solidam  gloriae  coniunctionem,  in  qua  filius  subiicietur  patri,  ut  sit  Deus  omnia  in  omnibus.  Secundum  hanc  dispensationem  oravit  Christus  ipse  in  terris,  et  nunc  ipso  advocato  freti  in  eius  nomine  patrem  oramus.  In  hac  doctrina  nihil  coactum,  vel  spinosum,  quia  non  prodit  Christus  ad  nos  nisi  mediator,  qui  a  Deo  exivit:  habet  tamen  Deum  in  se  manentem,  et  in  ipso  residet  omnis  plenitudo  deitatis,  ut  ad  Deum  nos  [pag.  15]  tandem  perducat,  dum  familiari  et  immediato,  ut  loquuntur,  deitatis  aspectu  quae  nunc  in  imagine  relucet,  solide  fruemur.  Clamet  nunc  Stancarus  nos  esse  Arrianos,  statim  evanescet  huius  calumniae  futilitas,  quando  fatemur  non  cadere  in  divinam  naturam  quod  tamen  personae  mediatoris  recte  aptatur.  Ubi  autem  in  una  Dei  essentia  tres  agnoscimus  distinctas  hypostases,  ut  Christi  respectu  unus  sit  Deus  eius  pater,  ipse  vero  sit  imago  Dei  invisibilis,  nihil  in  hac  doctrina  est  affine  Sabellii  errori.  Viderint  autem  quos  tantopere  oblectat  perpetua  distinctio,  ne  omnia  misceant  ac  confundant:  quia  deitatis  nomen  ubique  ad  patris  nomen  restringendo  mox  lacerant  in  partes,  ubi  filii  et  spiritus  commune  esse  volunt.  Porro  hallucinandi  causa  illis  est,  quod  nihil  observant  discriminis  inter  duas  notitiae  species,  ubi  indefinite  nobis  describitur  Dei  maiestas,  deinde  in  tribus  personis  se  patefacit.  Ac  usque  adeo  vera  est  ea  quam  asserimus  unitas,  ut  dum  seorsum  Deus  vocatur  Christus,  simul  comprehendatur  patris  deitas.  Nam  ubi  exclamat  Thomas:  [pag.  16]  Dominus  meus  et  Deus  meus  (Ioann.  20,  28),  mediatore  agnito  altius  transscendit.  Paulus  etiam  quum  pronunciat  Christum  esse  Deum  in  saecula  benedictum  (Rom.  9,  5),  non  secundam  vel  productam  divinitatem  imaginatur,  sed  quae  una  est  in  Christum  competere  intelligit.  Neque  tamen,  dum  sub  Dei  nomine  continentur  filius  et  spiritus,  obducitur  caligo,  quin  tres  personae  refulgeant,  et  sua  cuique  constet  proprietas.  Utinam  haec  qua  decet  modestia  et  sobrietate  secum  probe  reputent  fratres  polonici:  et  qui  nunc  commenti  novitate  tanquam  musto  inebriati  exsultant,  gustare  de  integro  non  graventur  doctrinam  bene  defaecatam  et  concoctam.