6:638  revelavit?  Hoc  tamen  omitto.  Panem  dicunt  esse  consecratum,  [pag.  131]  Quaero,  quo  ritu?  Longe  enim  abest  a  vera  consecratione  incantatio,  qua  utuntur  sacrifici.  Ergo,  aut  sequantur  atque  observent  quod  praecepit  Dominus,  aut  ne  secus  agendo  inanibus  titulis  se  ipsos  deludant.  Hestat,  ut  de  argumentis  aliquid  dicamus  in  quibus  satisfactum  sibi  negat.  Solutionem  meam  de  Naaman  Syro  valde  exagitat:  quia  dixerim  me  libenter  veniam  daturum,  si  quis  edita  simili  professione,  civilis  duntaxat  officii  causa,  missae  intersit.  Dicit  se  et  suos  hoc  idem  quotidie  testari:  sed  non  palam,  quia  sit  periculosum.  Quid  simile?  quum  Naaman  in  publico  sit  professus?  Hic  vero  simplicitatem  meam  ridet,  quod  imaginer  innumeram  turbam  astitisse:  quum  verisimilius  sit,  seorsum  cum  propheta  loquutum.  Ego  vero  professionem  eius  non  includo  in  illis  paucis  verbis:  sed  ex  eo  aestimandum  censeo  quod  facturum  se  pollicetur  :  imo  quod  statim  facit.  Quorsum  enim  mulos  duos  terra  onerat,  nisi  ut  testatum  faciat  omnibus,  se  cultum  habere  sibi  peculiarem,  atque  a  reliquis  separatum?  Consideremus  quo  loco  fuerit,  quam  sustinuerit  personam:  et  fatebimur,  tantam  mutationem  occultam  non  fuisse.  Putamusne,  quum  ad  regem  suum  reversus  foret,  tacuisse  de  tam  insigni  miraculo?  Ego  certe  [pag.  132]  non  dubito,  quin  modum  curationis  magnifice  praedicaverit.  Sed  coniecturis  non  est  opus  in  re  perspicua.  Mulos  onerat  terra  Chanaan,  in  qua  Deum  Israelis  adoret:  ut  se  ab  aliorum  deorum  cultu  abhorrere  testetur.  Sic  enim  sonant  eius  verba.  Quid  hac  confessione  apertius?  Hoc  faciant,  qui  eius  exemplo  se  tuentur:  et  me  habebunt  clementiorem.  Quanquam  hic  bonus  vir  pugnat  ipse  secum.  Ante  confessus  fuerat,  alienorum  deorum  sacra  tantae  abominationi  habenda  esse,  ut  ab  accessu  interdiceret  piis  omnibus:  nunc  autem  licitum  esse  contendit,  quod  ante  prorsus  damnaverat.  Nam  aut  nihil  proficiunt,  ad  exemplum  Naaman  confugiendo:  aut  tam  licebit  quaevis  gentium  sacrificia,  quam  missam  frequentare.  Verum  ea,  quam  attuli,  responsione  contentos  fore  spero,  quicunque  veritati  cedere  non  recusabunt.  Quod  ad  locum  Baruch  (6,  3)  spectat:  suam  sibi  verisimilitudinem  habeat.  Nemini  tamen  sano  unquam  persuadebit,  populum  Dei  in  solennibus  Babyloniorum  pompis,  in  idolorum  circumgestationibus,  permixtum  idololatris  fuisse,  qui  ad  idolorum  venerationem  ex  professo  congregati  erant.  Neque  verba  tale  quidquam  subindicant.  Videbitis,  inquit,  Babylonios  illud  agentes.  Non  dicit:  Quum  vos  cogent:  aut,  [pag.  133]  Quum  metu  accesseritis.  Neque  tamen  adeo  nobis  laborandum  est  de  hoc  testimonio,  quum  autor  sit  incertus.  Mihi  satis  est,  quod  prophetam  audio  clara  voce  illis  concionantem:  Fugite,  fugite:  immundum  ne  tetigeritis  (Ies.  o  2,11).