25:638  LE  QUATRIEME  SERMON  SUR  LE  CHAP.  I.  V.  16-18.  DU  JEUDI  HE  D'AVRIL  1555.  Nous  avons  veu  par  ci  devant  l'admonition  que  faisoit  Moyse,  a  elire  gens  qui  s'acquittassent  a  gouverner  le  peuple  :  car  si  on  eust  prins  des  iuges  a  la  volee  (comme  il  a  este  declare)  c'estoit  prophaner  le  siege  de  Dieu.  Il  falloit  donc  qu'en  cela  il  y  eust  bonne  discretion.  Mais  ici  Moyse  adiouste  un  article  que  nous  devons  bien  noter.  Car  encores  qu'il  ait  procure  que  ceux  qu'on  elisoit,  fussent  gens  craignans  Dieu,  et  douez  de  graces  singulieres,  si  ne  laisse-il  pas  neantmoins  a  leur  monstrer  leur  office,  et  a  les  advertir  de  ce  qu'ils  ont  a  faire.  En  quoy  nous  voyons  que  les  plus  sages  ont  besoin  d'estre  enseignez,  les  plus  droits,  et  les  plus  iustes  ont  besoin  d'estre  admonnestez.  Et  pourtant,  si  Dieu  desia  nous  a  mis  au  bon  chemin,  et  qu'il  nous  ait  eslargi  des  dons  du  sainct  Esprit:  ne  pensons  pas  que  la  doctrine  nous  soit  pourtant  superflue:  car  il  faut  que  nous  soyons  conduits  iusques  au  bout,  et  nous  savons  que  nostre  perfection  n'est  point  en  ce  monde,  ne  cependant  que  nous  portons  nostre  chair,  et  que  nous  conversons  ici  bas.  Et  au  reste,  que  ceux  que  Dieu  aura  honorez,  les  constituant  en  estat,  et  degre  d'honneur,  cognoissent  qu'ils  ont  besoin  qu'on  leur  declare  leur  devoir,  et  qu'on  les  incite  a  s'acquitter  comme  il  appartient.  Or  venons  maintenant  a  ce  qui  est  ici  contenu.  Moyse  en  premier  lieu  enioint  a  ceux  qui  sont  ordonnez  iuges  et  gouverneurs  d'ouir  les  causes.  En  quoy  il  signifie  qu'ils  doyvent  estre  attentifs,  et  diligens  a  cognoistre  ce  qui  est  du  droit  d'un  chacun  :  car  si  un  iuge  ne  daigne  pas  escouter,  comment  exercera  il  son  office?  Nous  savons  encores  que  les  hommes  mettent  toute  peine  a  iuger  droit  selon  leur  fragilite,  qu'ils  pourront  faillir:  et  s'il  y  a  encores  de  la  nonchalance,  il  faudra  que  tout  aille  en  confusion.  Ainsi  ce  n'est  point  sans  cause,  que  Moyse  notamment  exhorte  les  iuges  a  bien  cognoistre.  Et  notamment  il  dit,  entre  les  Iuifs,  et  entre  les  estrangers.  Comme  s'il  disoit,  qu'il  faut  qu'un  chacun  ait  sa  raison,  nonobstant  que  la  cognoissance  quelque  fois  apportera  faveur  ou  haine,  qu'il  faut  qu'un  iuge  qui  veut  bien  faire  son  office,  oublie  tout  ce  qui  le  pourroit  divertir  du  droit  chemin.  Et  mesmes,  pource  que  les  estrangers  n'ont  nul  support  ni  addresse,  il  faut  que  le  iuge  supplee  a  cela.  Et  s'il  n'attend  nulle  recompense,  et  non  pas  un  grand  merci  de  celuy  auquel  il  peut  faire  droit,  qu'il  ne  laisse  pas  pourtant  de  s'acquitter  :  car  ce  service-la  est  agreable  a  Dieu:  encores  qu'il  n'y  en  vienne  nul  salaire  du  coste  des  hommes,  Dieu  est  assez  puissant  pour  le  revaloir.  Or  donc  ceux  qui  sont  en  estat  de  iustice,  ont  ici  leur  lecon