7:637  637  REFORMANDAE  RATIO.  638  ministros?  Sed  enim,  inquiunt,  id  accidere  nunquam  patietur  ecclesiae  perpetuitas.  Ego  sane  concedo,  fieri  nunquam  posse,  ut  ecclesia  intercidat.  At  quum  ad  pastores  referunt,  quod  de  perpetua  ecclesiae  duratione  promittitur,  in  eo  vehementer  errant.  Neque  enim  si  desint  pastores,  ideo  protinus  desinit  ecclesia.  Tunc  quidem,  fateor,  vere  et  stat  et  floret,  quum  in  unum  ovile  [pag.  146]  colliguntur  oves:  quod  nisi  pastorum  opera  fieri  nequit.  Sed  experientia  docet,  interdum  dissipatas  etiam  oves  servari  arcana  Dei  virtute.  Latet,  inquam,  interdum  ecclesia,  fugitque  hominum  oculos,  ut  frustra  externum  in  ea  regimen  aut  principatus  quispiam  requiratur.  Itaque  abrupta  episcoporum  successione,  stat  nihilominus  ecclesiae  perpetuitas.  Si  nondum  intelligunt,  de  nihilo  se  protervire,  quaero  ubinam  legerint,  oportere  ad  finem  usque  mundi,  continua  serie,  alios  succedere  aliis  episcopos?  At  nos  legimus,  quum  olim,  sacerdotum  partim  inscitia  et  ignavia,  partim  perfidia  et  scelere,  vitiatus  esset  Dei  cultus,  inculta  iaceret  sacrorum  administratio,  perversa  esset  pia  doctrina,  ecclesia  prope  concidisset,  extraordinario  Dei  afflatu  suscitatos  fuisse  prophetas  qui  res  perditas  restituerent.  Quid  obstabit,  quominus  idem  nunc  quoque  praestet?  Et  sane,  ita  necesse  fuit.  Nec  vero  minus  ad  nos,  quam  ad  veterem  populum,  quod  habetur  apud  Ezechielem  et  Ieremiam,  pertinet  :  Deum,  ut  improborum  pastorum  nequitiam  ulciscatur,  illis  depulsis,  probos  daturum  ac  fideles,  qui  secundum  eius  voluntatem  pascant  (Ezech.  34,  2;  Ier.  3,  15  et  33,  12).  Tametsi  enim  tales  quotidie  dat  per  hominum  vocationem,  singulare  tamen  est  donandi  genus,  quum  cessante  hominum  opera  solus  ipse  constituit,  quos  et  necessarios  esse  et  hominum  iudicio  praeteriri  videt.  Iam  si  quod  in  nos  vibrant  telum,  quispiam  in  ipsos  retorqueat,  quo  se  clypeo  defendent?  Suggestus  fere  omnes  apud  ipsos  occupant  monachi,  vel  conductitii  alii  rabulae,  qui  declamitare,  rixando  in  suis  sorbonis,  didicerunt.  Quae  est  omnium  istorum  vocatio?  Certe  non  aliam  proferent,  [pag.  147]  nisi  quod  quum  muti  essent  episcopi,  cum  toto  sacerdotum  suorum  grege,  alienos  in  locum  suum  subrogarunt.  Sed  quum  nova  sit  ista  substitutio,  saltem  plus  octingentis  demum  annis  post  aetatem  apostolorum  nata  :  desinant  horum  nomine  *)  tam  impudenter  abuti.  Qui  nobis  hoc  tempore  facem  praetulerunt,  ut  a  diuturno  errore  in  viam  rediremus,  sanctos  Dei  prophetas  fuisse,  testatur  praeclarum,  quod  ediderunt,  et  vere  divinum  ministerii  sui  specimen.  Ad  hoc  beneficium  ecclesiae  praestandum  nunquam  vocati  fuissent  a  lupis  qui  vorandi  perdendique  rabie  ardebant.  Ergo  ad  sanandum  malum  1)  de  la  succession  apostolique.