49:636  ces  mutins  avec  toutes  leurs  familles.  Les  hommes  mettent-ils  la  main  a  un  tel  acte?  Non.  Mais  Dieu  monstre  que  sa  maieste  avoit  este  offensee.  La  dessus  encore  le  peuple  murmure.  Quoy  (disentils)  et  faut-il  que  pour  deux  hommes  nous  soyons  ainsi  tormentez,  et  qu'il  y  ait  tant  de  gens  qui  soyent  peris,  et  que  mesme  la  terre  les  ait  engloutis,  qui  est  une  chose  si  terrible?  Mais  pourquoy  ceci  est-il  advenu?  Voyla  Dieu  qui  a  besongne,  et  declare  qu'on  ne  s'en  peut  prendre  qu'a  luy  seul:  et  maintenant  le  peuple  est  si  malin  de  murmurer  encores.  Et  pourtant  il  advient  une  desconfiture  horrible,  que  quatorze  mille  ou  environ  perissent,  a  cause  de  ceste  mutinerie  la.  Maintenant  faisons  nostre  profit  de  ceste  Histoire.  Et  en  premier  lieu  notons,  que  tous  ceux  qui  taschent  de  troubler  l'ordre  que  Dieu  avoit  establi,  ne  font  point  la  guerre  aux  creatures:  mais  vienent  heurter  des  cornes  comme  des  boeufs  sauvages  a  l'encontre  de  Dieu.  Or  ceci  est  bien  mal  cognu,  comme  on  voit  par  experience.  Car  tous  les  iours  combien  en  trouvera-on  qui  voudroyent  avoir  tout  perverti,  quand  les  choses  ne  leur  vienent  point  a  leur  fantasie?  Si  on  veut  tenir  les  gens  en  bonne  police  et  sous  quelque  ioug,  les  desbauchez  se  despiteront:  car  ils  voudroyent  avoir  licence  de  faire  tout  ce  qu'ils  desirent,  et  qu'on  leur  mist  la  bride  sur  le  col,  comme  on  dit.  Ils  se  plaindront  de  trop  grande  rigueur.  Et  il  n'y  a  point  de  propos  (diront-ils)  et  on  nous  tient  ici  comme  des  esclaves.  Tous  les  iours  cela  sera  ouy  et  ne  pensons  nous  pas  qu'il  soit  enregistre  au  ciel?  et  non  seulement  ils  murmurent:  mais  ils  voudroyent  que  tout  fust  aboli,  et  qu'il  y  veint  une  confusion  brutale,  afin  que  tout  leur  fust  licite.  Et  on  le  voit.  Que  pleust  a  Dieu  que  les  exemples  n'en  fussent  pas  si  notoires.  Combien  y  en  a  il  auiourd'huy  qui  se  tiendront  quoys,  d'autant  qu'ils  ne  peuvent  executer  leur  malice?  mais  s'ils  en  avoyent  l'occasion  que  seroit-ce?  Et  on  Ta  veu,  que  s'il  y  a  eu  entre  les  Iuifs  de  Core,  Dathan  et  Abirom,  il  y  en  a  eu  a  Geneve:  et  non  seulemeut  ils  ont  murmure,  mais  il  n'a  pas  tenu  a  eux  que  tout  soit  alle  en  ruine,  et  que  tout  n'ait  este  tellement  desborde,  qu'il  y  ait  eu  ici  une  Babylone  si  confuse  que  rien  plus.  Voyla  donc  qui  nous  doit  tant  mieux  toucher,  afin  que  nous  appliquions  ceste  doctrine  a  nostre  instruction  :  c'est  que  nous  avisions  bien,  quand  Dieu  aura  establi  quelque  ordre,  de  ne  nous  point  eslever  a  l'encontre  :  car  en  cuidant  batailler  contre  les  hommes  mortels,  nous  sentirons  que  Dieu  prendra  la  cause,  comme  elle  est  siene,  et  nous  sera  ennemi.  Ainsi  donc  que  nous  apprenions  de  nous  ranger  en  toute  humilite  et  modestie:  et  que  ce  qui  est  de  Dieu  nous  le  recevions  paisiblement,  et  sana